Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1185-Sgardium 17
Frater Baptista de Ursinis magister
xvii. Quod modeste et quiete caput et fratres in sgardiorum celebratione se habeant, et quod in eis utantur balotis pro votis
Ut iusticia cuilibet maturius servetur, concedatur atque ministretur, stabilimus, quod caput sgardiorum summa attentione, silentio et prudentia partes ante sgardium constitutas audiat et intelligat, caveatque, ne verbo aut opere sermones et rationes partium interrumpat, immo eas loqui permittat. Quo finito fratres sgardii sibi assistentes consulat et presentibus partibus interroget, si rationes et allegationes partium intellexerint. Quod si intellecte non fuerint, tunc partes rationes suas et iura sua compendio(a) et brevitate ad assistentium intelligentiam resumant, ut sgardiorum caput partium dicta resumendi ocasionem non habeat, in quo mentis intentionem declaret aut animos fratrum assistentium deviare possit. Quod si scripture vel bulle presentate fuerint, eas clarius explicari fratribus sgardiorum per vicecancellarium sinat, ut audientium mentes omnem veritatem accipiant. Caveantque fratres et caput sgardiorum, postquam semel in sgardio interfuerint ac iuramentum secundum statuta(b) prestiterint, ne tractata aut conclusa inter eos alicui revelent aut manifestent vel dolo, precio, amore, timore, odio aut spe statuta, consuetudines et iura partium infringantur(c). Quod si ullo unquam tempore ab aliquo contrafactum esset, idque compertum fuerit, inhabilis ad obtinendum beneficia et officia in religione tanquam periurus censeatur. Atque ut liberius vota concedantur in dictis sgardiis, uti balotis pro votis precipimus. Quod si observatum non fuerit, sententie nulle censeantur.
oo (b) Corrects statatuta.
(c) Ms.: infringatur; Venice 1495, Ulm 1496, Salamanca 1534: infringatur.
Next Sgardium 18 | Back to the Contents