Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1091-Hospitalitas 16
Frater Iacobus de Milly(a) magister
xvi. Quod seculares egroti in infirmaria testamentum conficiant
Decet Christianos mala valitudine implicitos anime et corporis salutem querere et ad semovendas(b) lites de bonis disponere et testari. Ideo sancimus, ut quotienscumque seculares egrotantes in infirmariam introducti fuerint, confiteri teneantur eucharistiamque recipiant, et demum eos infirmarius, prior et probi viri moneant et hortentur, ut testamentum conficiant. Quod quidem testamentum per priorem vel scribam infirmarię presente priore vel alio presbytero prioris loco duobus quoque vel tribus adhibitis testibus recipiatur et conficiatur. Quod quidem testamentum sub poenis iuris canonici non recidatur. Ipse quoque prior et scriba dictum testamentum auctoritatem et facultatem conficiendi adhibitis testibus adminus duobus tanquam notarii publici essent habeant eisque concedimus, taleque testamentum in aliquo libro redigatur et ad futuram [46v] memoriam ac pro conservatione iuris et iusticie uniuscuiusque in bonis defunctorum scribatur et continuetur. Si vero seculares infirmi testamentum condere recusarent vel non possent, tunc infirmarius et probi homines per priorem vel scribam inventarium de bonis eorum fieri coram testibus iubeant, ut infirmis ad pristinam salutem reductis dentur et restituantur, seu eis vita functis de bonis ipsorum constet, ad quorum interest iurium conservationem. Ipsa quoque bona inventariata in loco tuto sub clavibus infirmarii et proborum virorum recludantur.
(b) Venice 1495, Salamanca 1534; Ms. sumendas; Ulm 1496: se movendas.
Next Hospitalitas 17 | Back to the Contents