Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1037-Ecclesia 4
[34v] Consuetudo
iiii. Festa, que servari debent a fratribus hospitalis.
Convenit devota mente sanctorum festa celebrare, tenere, observare, ut ipsorum precibus adiuti ordo noster conservetur, amplietur et eterne vite premium mereamur. Hinc sancitum est festa inferius declarata a fratribus nostris servari:
Primo festum natalis domini nostri Iesu Christi. Item festa sanctorum Stephani protomartiris ac Ioannis Evangeliste pariter et sanctorum innocentium. Item festa circumcisionis, epiphanie, purificationis nostre domine, annuntiationis eiusdem. Item pasca domini cum secunda et tertia feria sequentibus. Item festa sancti Georgii martiris, sanctorum Philippi et Iacobi, utrunque festum sancte crucis. Item festum ascensionis domini nostri Iesu Christi, festum pentecostes cum secunda et tertia feria sequentibus, festum corporis Christi, nativitatis sancti Ioannis Baptiste, sanctorum Petri et Pauli apostolorum, sancte Marię Magdalene, sancti Iacobi apostoli, sancti Laurentii martiris, assumptionis nostre domine, sancti Bartholomei apostoli, nativitatis nostre domine, Matthei apostoli, sancti Michaelis archangeli, sanctorum Simonis et Iude, omnium sanctorum prima die Novembris, sancti Andreę apostoli, sancti Nicolai episcopi, conceptionis nostre dominę, sancte Lucie virginis ac sancti Thome apostoli.
Next Ecclesia 5 | Back to the Contents