Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
428-Statuts1493-Alienations 1
[q5v]
Des alienations
Frere Pierre d’Aubusson cardinal et maistre
i. Que ne se facent alienacions
Assez cautement ne se peut pourveoir que alienations et distractions des possessions de nostre ordre ne se facent, sur quoy plusieurs institutions sont promulgées par les-[q6r]quelles icelles alienacions sont defendues. Neantmoins(a) tant est la insolence et contumace d’aulcuns qui, repulsent le jou d’obeissance, presument contrevenir, en vergoigne de nostre religion et grief prejudice d’icelle. Et pourtant, adherens aux establissemens et pourveyans, plus cautement prohibissons et defendons soubz peine de privacion des commanderies et benefices aux prieurs, chastellain d’Emposte, bailliz, commandeurs et freres de nostre ordre, en quelconque lieu que sont constituez, tant en chappitre que assemblee provincial ou hors, que pour aulcune maniere ne presument consulter et traicter de alienacions, ypotecacions, distractions, transportacions ou donacions en emphiteose ou perpetuelle, soubz quelconque forme de parolle et condicion, de commanderies, possessions, proprietés et lieux, de quelconques condicion et qualités que soyent. Et se contreferont, et seront de ce convaincuz ce fait, choyent en privacion de commanderies ou benefices desquelz la provision soit devolue au maistre et couvent de Rhodes et d’iceux soit pourveu. Et se sera frere couventual perde l’ancienneté. Et neantmoins(b) de tel exces le contrefaisant soit accusé et convict, de laquelle accusation la puissance à chascun sans peine donnons. Et personellement soit cité à respondre sur lesdictes choses affin que justice à toute rigeur soit faicte. Neantmoins n’est interdicte faculté et auctorité aux prieurs et chastellain d’Emposte selon la coustume du pays de donner et octroyer en chappitre provincial à cens annuel possessions et proprietez lesquelles riens ou peu de utilité et prouffit rendent aux commanderies et religion affin que soient meliorez et augmentez. Neantmoins que se facent à temps determiné, lequel non excede vingt et neuf ans, mais pour mineur temps. Lesquelx passez, telles choses qui seront données(c) à cens annuel aux commanderies et religion(d) avec le meliorement soyent rendues et retournées.
(b) neautmoins.
(c) dounees.
(d) religions.
(e) It follows the Kolophon: P[ierre] L[e Dru].
Next --- | Back to the Contents