Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
368-Collations 4
[o4v]
Frère Dieudonné de Gouzon maistre
iiii. Que le prieur doye signifier au maistre et couvent les commanderies vaccantes oultre mer, autrement soit privé de la collation des commanderies pour ledit an
Pource que désirons éviter les frauldes en la collation des commanderies, pourtant nous establissons que les prieurs et chastellain d’Emposte chascun an, après la feste de saint Jehan Baptiste du moys de juing, l’an revolu entier, doye cerciorer et signifier par ses lectres au maistre et couvent de Rhodes les commanderies vaccantes en son prieuré et chastellanie d’Emposte ou es parties de ponent auctentiquement, particulièrement et nomméement avec toute diligence. Et que ne puist pourveoir en vertu de leurs prééminences d’aulcunes commanderies, jusques à tant que le maistre et couvent, selon l’ancienne coustume, establissemens et leurs prééminences auront faicte collation des commanderies de ladite [o5r] année. Et que de celles provisons les prieurs ayent notice et responce auctentique du maistre et couvent. La quelle eue, et non devant, doyent disposer selon leurs prééminences du résidu des commanderies dudit an. Et se les prieurs contre feront à ceste institution, incontinent les collations par eulx faictes sont nulles et néantmoins sont privez de leurs collations pour ledit an ; et icelles commanderies sont devolues à la disposition du maistre et couvent.
Next Collations 5 | Back to the Contents