Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
362-Elections 18
[o2v]
Frere Baptiste des Ursins maistre
[o3r] xviii. De l’élection du capitaine du chasteau Saint-Pierre
Noz prédécesseurs, desirans faire chose de grant louenge, ont ordonné et édifié par force d’armes contre la volunté de l’ennemy le chasteau Saint-Pierre en l’Asie Mineur qui au temps présent est subjecte au Turcq, ennemy de cristiens, par la construction de la quelle place honneur prouffit redonde à la religion cristienne, car les bannieres de la saincte croix sont manifestées en la jurisdiction des Turcqs, et plusieurs prisonniers cristiens subgectz à leur tirannie chascun an par le refuge dudit chasteau retournent à la foy catholicque et vont à leur propre domicille. Et pourtant(a) avecques diligence et solicitude on doit vacquer et entendre à la garnison dudit chasteau. Doncques, le maistre et conseil ordinaire, quant vouldront faire capitaine diceluy, diligemment considèrent et eslisent à la deffense dudit chastel ung religieux expert et de prouvée chevalerie en capitaine dicelluy. Lequel doye(b) garnir et fournir de bombardes, arbalestes et toutes choses qui appartiennent aux armes, et aussi de vivres, et selon la qualité du temps de soldoyers, et de secours à la deffense dicelle place. Et doye pourveoir ung an devant la vaccacion de la capitainerie dudit chasteau d’autre capitaine, en l’élection du quel ne soit gardé ordre ne tour des langues, mais indifferentement de toutes langues audit chasteau soit préféry celuy qui sera veu de meure, eage et proesse ; et ladite capitainerie soit donnée pour le terme d’un ou de deux ou de trois ans au plus, comme au maistre et conseil sera bien veu et ainsi que la qualité du temps et des choses requerra, tellement que ne puist estre ordonné pour plus grant terme que trois ans, mais bien pour mains.
(b) d.
Next Elections 19 | Back to the Contents