Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
316-Freres 43
[m7v]
Frère Anthoine Fluvian maistre
xliii. Que les frères ne facent marchandise
Deshonneste chose et griefve chose est ceulx qui sont desdiez et deputez à profession de religion et à deffence de la foy catholicque à laquelle de toute leur peine doibvent servir que se veullent appliquer par solicite curiosité à negociation des marchandises. Pourtant nous deffendons que les frères de nostre ordre, de quelque condicion que soient, ne présument excercer marchandise, c’est assavoir acheter et vendre choses mercantilez pour cause de gaigner. Se aulcun contre fera incoure la peine de quarantaine. Et la substance que sera trouvée en marchandise pour la moictié soit donné au trésor et l’autre moictié à l’accuseur prouvant. Toutesfois se aulcun venenat au couvent ou partent diceluy auront aulcunes choses que ne pevent porter sans dommaige et à icelluy éviter procurast commutation des choses que icelles oudit cas puissent vendre sans aulcune peine.