Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
306-Freres 33
[m5v]
Frère Philibert de Nailhac maistre
xxxiii. Que frères ne soyent vaccabonds hors des limites des priorez
Il est chose indue et inhoneste que les frères tenuz à saincte obéissance soient veuz vaccabonds par les provinces. Pourtant deffendons que les commandeurs et frères de nostre ordre par aulcune manière ne puissent issir hors des limites des prieurez et chastellanie d’Emposte et commanderies à l’obéissance desquelz sont subgectz sans licence du maistre, ou prieur, ou chastellain d’Emposte, ou du commandeur de la licence desquelz le puissent faire pour aulcun temps se la nécessité ou utilité de la religion le contrainct et non autrement. Et aussi il n’est point licite aux prieurs ou chastellain d’Emposte aler hors des limites des priorez ou chastellanie d’Emposte sans licence du maistre ou de son lieutenant, se non que ardues affaires le contraindent ou chose du grant poix – que autrement faire ne se porroit – le contraindent faire. Et le commandeur ne puisse partir hors de sa commanderie se non au couvent de Rhodes au service de nostre ordre ou se d’embassade ou autre commission de la religion ou se seurement ne povoit demourer es commanderies. Autrement contrefaisant perdent les rentes des commanderies durant le temps de leur absence qui sont appliquées au trésor.