Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
301-Freres 28
[m4v]
Frère Jehan Ferdinand de Heredie maistre
xxviii. Que les frères ne voyent avec gendarmes et ne se meslent de leurs batailles
Il est chose indécente et non consonante à raison que les frères de nostre ordre desdiez à la deffence de la foy s’empechent des guerres des cristiens, mais doibvent excercer les armes à la tuicion de la foy et conservacion de nostre religion. Pourtant nous establissons que le frères de nostre religion ne s’empeschent des guerres avecques les gens d’armes des cristiens. Et se aulcun contrefera perde l’habit. Et se de grâce especial le recouvrera soit privé de l’administracion des commanderiez et bénéfices pour le terme de dix ans, la quelle ne puisse avoir jusques à tant que soient passés lesdiz dix ans. Et deffendons au prieur et chastellain d’Emposte et commmandeurs qu’ilz ne doyent donner licence aux frères de soy excercer es guerres des cristiens se ne leur sera commandé par le prince ou seigneur du pays qui adoncques puissent donner licence. Toutesfoiz en icelluy cas ne puissent porter les armes et enseigne de nostre religion. Mais se pour deffence de nostre religion ou en compaignie du prieur se mesleront de telles guerres que adoncques puissent user des enseignes de nostre ordre.