Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
288-Freres 15
[m2r]
Frère Elyon de Villenove maistre
xv. Du frère qui fera dommaige à la religion plus d’un marc d’argent
Désirans obvier aux exces et delictz de noz frères nous establissons que se frére fera dommaige à nostre religion plus d’un marc d’argent, se plaincte se fera de luy, soit privé de l’habit. Et se fera dommaige moins d’un marc d’argent soit en septaine ou quarantaine ainsi que semblera aux frères de l’esgard. Et pour-[m2v]quoy semble estre chose tresforte et severe que pour chascun exces oultre ung marc d’argent le religieux perde l’habit, car les delitz et crimes souventesfois sont aggravés par les cironstances et pourtant la qualité diceluy delit par meure conseil doibt estre considérée et poisée. Doncques toutes et quantesfoiz par le maistre se fera plaincte de dommaige oultre le marc d’argent, premièrement devant l’execucion du delit la plaincte soit rapportée au conseil(a) où(b) meurement soit discuté dicelluy delict, par preuvez auctenticques et legittimes ou par confession de l’accusé le crime soit manifest et la cause de la plaincte plus clerement soit demonstrée. Lesquelles choses faictes de rechief soit faicte la plaincte en l’assemblée publicque et devant l’esgard l’accusé auy(c) meurement et par bon conseil soit agicté et discuté. Et bien pensé et avec gravité considérées les circunstances du delit du quel sera la plaincte, aussi la qualité, vie et condicion de l’accusé, justice soit per droicte balance administrée.
(b) on.
(c) any.