Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
250-Prieurs 1
[l2v]
Des prieurs
Frère Hugues Revel maistre
i. Comment se doibvent eslire les lieutenans des prieurs trespassez
IL n’appartient pas la compaignie de noz frères estre sans président affin que sans gouvernement les affaires de nostre ordre négligemment soient traictées. Et pourtant nous establissons que quant les prieurs ou chastellain d’Emposte seront trespassez es parties d’oultre mer le commandeur de la commanderie où sera trespassé doye appeller douze commandeurs – se tant y aura et se moins que en appelle le plus que porra – oudit prieuré et chastellanie desquelz les commanderies seront plus prochaines. Lesquelz assemblées, par meure déliberacion doient eslire et députer aulcun des frères dicelluy prieuré, le plus ydoine et apte à l’administracion et charge, que tiengne lieu du prieur et [l3r] chastellain d’Emposte. Auquel esleu tous les frères dudit prieuré doyent obéyr jusques à tant que le trespas du prieur soit parvenu à la congnoissance du maistre deça mer et que aultrement par le maistre et couvent soit commandé. Et se le prieur trespassera en aucunes des chambres prioralles retenues à sa main que le commandeur qui sera le plus prochain à icelle chambre pareillement doye appeller xii commandeurs qui doyent eslire le lieutenant du prieur. Et se le prieur trespassera hors des limittes du prieuré à cause d’embassade ou par aultre occasion que adoncques le lieutenant du prieur ou chastellain lequel aura laissé à son partement du prieuré procure et face exequir la élection du lieutenant en la manière dessus declarée ; et doye appeller les commandeurs qui doient eslire le lieutenant du prieur.