Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
237-Baillifz 35
[k7v]
Frere Pierre Raymond Sacoste maistre
xxxv. De la institution du chancellier nouveau bailly
Nostre religion et les suppostz d’icelle se doibvent esjouyr, car la difference qui separoit les sept langues et nations de nostre couvent est sopie, levée et estaincte, laquelle eust esté occasion de grant dommaige se prompt remede n’eust esté donné. Et pourtant, apres diverses indagation de inquisition de concorde, affin que nostre religion joyse de perpetuelle paix et que la nourriture de scandalles soit levée et possedons en noz pensées le lien de vraye charité, pourtant nous instituons ung nouveau bailly couventual qui soit le huitiesme et tiengne le derrenier lieu apres les autres baillifz couventuaulx. Lequel bailly nouveau sera appellé chancellier que joyra des gaiges des(a) autres baillifz couventuaulx. Laquelle dignité de bailliage perpetuellement donnons à la venerable langue d’Espaigne laquelle separons et divisons en deux langues constituées en une aulberge, car icelle nation est(b) remplye de honorables chevaliers de nostre ordre et biens merens de celluy. Non prejudicant toutesfois par ce aux noms, honneurs, dignitez, presidences, preeminences, prerogative et utilitez des autres baillifz couventuaulx et langues et du tresorier general à qui appartient pour son office garder la bulle commune de fer. Revocquant, cassant, adnullant du consentement de tous les freres des langues escriptures, lettres et bulles de promesses et obligations aultrefois [k8r] faictes pour raisons des discordes estant entre les sept langues, non obstant quelzconques establissemens, coustumes, usaiges et nature dudit ordre faisant aulcunement au contraire.
(b) e.
Next Baillifz 36 | Back to the Contents