Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
178-Esgard 10
[i4r]
Frere Jehan de Lastic maistre
x. Que pour l’esgard soyent esleuz chiefz et freres par ceulx qui le doivent deputer
On doit user de grand prudence en la nominacion des freres des esgards affin que tant le noble jugement ne soit alteré. Pourtant nous establissons que toutes et quantesfoiz naistra difference ou question de quelconque peticion civille ou criminelle entre baillifz ou prieurs et chastellain d’Emposte ou freres et unes des parties demandera justice ou souevrain, adoncques l’esgard soit octroyé. Toutesfoiz, se la difference sera entre freres chevaliers d’une part et chappellains et sergens d’armes d’autre parte telle difference doit estre diffinie par maistre et conseil ordinaire. Quant sera octroyé ledit esgard selon la forme des establissemens le maistre ordonnera ung preudomme ydoine pour chief de l’esgard et le nommera au maistre escuyer. Et se l’esgarde sera donné aux freres subgiectz à l’obedience du mareschal entre lesquelz naisse la difference, adoncques [i4v] le mareschal assignera au maistre escuyer ung frere ydoine pour le chief de l’esgard. Et le maistre escuyer, apres que sera nommé le chief de l’esgard(a), icelluy ensuyvra cestuy ordre en la deputacion des freres des esgards : Lesquelz ne doit point nommer à sa volunté, mais ira aux baillifz couventuaux ou à leurs lieutenans et signifiera comme esgard est donné entre aucuns sur certaine difference ; et d’iceux demandera freres ung ou plusieurs se sera necessaire estre assignez pour ledit esgard. Laquelle demande faicte, le baillif ou son lieutenant nommera et eslira ung preudomme ydoine et l’assignera pour l’esgard au maistre escuyer. Lequel le maistre escuier commandera estre oudit esgard et non autre. Et se aux choses dessusdites le maistre escuier contrefera le mareschal le doit pugnir se l’exigence des cas. Et ce qui sera diffiny par l’esgard inviolablement commandons estre gardé. Et le maistre soit tenu de commander que soit mys en execution. Et le mareschal selon l’ancienne(b) coustume peult faire plaincte du frere de son obedience.
(b) lanciennete.