Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
116-Trésor 20
[g4v]
Frère Jehan de Lastic maistre
xx. Des huit auditeurs des comptes
On doit avoir grant diligence et sollicitude à l’utilité et prouffit de nostre trésor qui porte les charges et nous soustient. Pourtant nous establissons que oultre le grant commandeur, les deux procureurs du commun trésor et le conservateur général huit frères de huit langues, ung de chascune langue soient députez et esleuz qui ayent puissance et auctorité de visiter, oyr et recongnoistre tous les comptes et affaires du trésor et comment sont administrées et gouvernez ; et doyent députer ung jour en la sepmaine pour excercer lesdites choses ; et se aulcune chose trouveront qui face à reformer le doient referir au maistre et au conseil ordinaire qui postposez tous aultres affaires sur ce doyent pourveoir. Iceulx frèrers suffisans, ydoines, intelligens et aptes audit office seront esleuz par les frères des langues desquelz esleuz soient présentez aux maistre et conseil ordinaire, en présence desquelz constituez jureront solennellement que loyaulememnt procureront le prouffit du trésor et selon leur conscience garderont le dommaige. Et lesditz huit frères seront présens à la reddicion des comptes que chascun moys se fera au maistre et conseil ; aussi seront présens à tous les payemens qui se feront par le trésor. Et chascun an lesditz huit frères seront muez et aultres esleuz en la manière dessusdicte.