Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
109-Trésor 13
[g2v]
Frère Anthoine Fluvian maistre
xiii. Quelz gaiges le trésor doit donner aux embassadeurs
Amoderans les gaiges establissons que embassadeurs lesquelz pour les affaires de nostre religion sont envoyez à plusieurs provinces du monde ja soit que soustiennent [g3r] la charge du voyage toutesfois sont tenuz de servir à nostre ordre et pour les services ont plus grandes rémunérations lesquelles sont en compensation de leurs fatigues ; et pourtant ayent les gaiges cy après declairez : C’est assavoir s’il est prieur ou baillif s’il est chargé d’embassade pour ponent(a) preigne deux ducatz du commun trésor pour chascun jour durant le temps de leur embassade, et s’il est commandeur ung ducat, et se le commandeur sera de telle condicion pourquoy semble aux maistres et conseil qui mérite plus grant quantité, adoncques porront adjoindre demy ducat pour chsacun jour. Oultre plus le maistre et conseil selon la qualité des choses et des voyages donneront gaiges aux embassadeurs qui feront leur embassade en levant. Et voulons que lesditz embassadeurs personellement retournent en couvent affin que par leur relation soient advisez de toutes choses. La quelle relacion eue le maistre et couvent selon la condicion des choses pourvoient et considéré la prudence, diligence et curieuse exécucion de l’embassadeur l’ayent pour recommandé en honneurs et promocions.