Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
097-Trésor 1
[f7v]
Du trésor
Usaige
i. Des charges que se doibvent payer au trésor et des establissemens et ordonannces que se doibvent faire à l’exaction et réception diceulx
Les bienfaicteurs de nostre religion considerans l’ardeur du service divin et de la diligence de l’ospitalité, aulmosnes et excercice des armes contre les infidelz qui se font en icelle religion par bonne raison induitz et meuz [f8r] ont donnez places et possessions et orné de singulières grâces desquelz augmenté et amplyé ledit ordre peult supplier aux sainctes œuvres et excercices. Et ja soit que par ancienne coustume l’administration diceulx biens selon les mérites de noz chevaliers soit commise, néantmoins selon la qualité du temps et opportunité des choses nostredit ordre retient et reserve aulcune part et portion, car aultrement ne pourroit supplir aux charges publiques. Quant soit chose absourde, inique et perverse à soy approprier et en uts(a) particuliers convertir ce qu’est commun et aux saincts œuvres desdyé la prudence d’un chascun peult assez considerer. Et pourtant, par rigoreux remèdes, ordinations et institutions, se accoustume de procéder contre les mal paysans et contumaces affin que aulcun contre la volunté et institutions des bienfaicteurs et fondateurs desditz biens ne use et iceulx traicte et usurpe comme propres. Se les prévaricateurs et détenteurs de publicques charges et droitz du trésor n’estoyent pugniz et extirpés entreviendroit l’extermination, subversion et ruyne dudit ordre – que Dieu ne vueille. Comment aux ecclesiasticques charges, et aux despenses de l’ospitalité, et des armes, et desquelz deniers se pourra supplir se les facultés et biens à ces sainctes œuvres desdyez sont occupés ?
Mais pource qu’est nécessaire obtemperer à la condition du temps, laquelle est subjecte à continuelle mutation, et les qualités et nature des hommes par icelle mutation sont alterées ausquelles est besoing pourvoir selon le temps, pourtant ne se peult députer déterminée portion laquelle se doibt payer audit trésor, mais aulcunesfoiz l’estat estant pacificque cincquiesme ou quatriesme portion est imposée, aulcunesfois en eminente nécessité le tiers, la moicté ou trois portions sont députez. Ne aussi institutions(b) pardurables pour exigir lesditez portions, conserver et avoir se peuvent promulguier, car tantost avec le temps passent, expirent et sont adnichilées que aulcunesfois avec rigueur, aultresfois avec doulceur est convenant procéder. Pourtant au regard de la taxation de [f8v] la portion et charge qui(c) doibt payer et la institution et ordonnance et manière de exiger et recuillir icelle taxation ledit chappitre général a l’auctorité et puissance ou se pourvoye desditez choses selon la condition du temps. Et ainsi en chascun chappitre général es choses convenientes les droiz dudit trésor à imposer et exigir et institutions au temps et personnes accomodeez sont faictes et promulguées, lesquelles avec diligence et prudence sont mises en escript. Et quant esdiz chappitres sont publieez sont envoyez aux priorez(d) et chastellanie d’Emposte affin que soyent selon le teneur exéquutées, et que les contumacez soyent privez par les remèdes et peines ordonnées, car on ne doibt laisser la playe mortelle pourrir, mas icelle par cautère purifier affin que par contagion ne gaste les autres et que à nostre religion ne puist donner detriment.
(a) instituons.
(a) Missing.
(a) piorerz.