Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
084-Hospitalité 9
[f4v]
Frere Jehan de Lastic maistre
ix. Que soyent deputez medecins au service de l’enfermerie et visitent les malades à la quelle visitaion l’enfermier et l’escripvain de l’enfermerie doyent estre present
La sapience et clemence divine, voulant pourveoir à la incommodité spirituelle et corporelle de humain lignaige, a prouveu que les subtilz inventeurs ont trouvé l’art de medicine tresapte et tresutile à la quelle, apres qu’on a demandé l’aide de Dieu, on doit recourir pour avoir santé, car on ne doit point tempter Dieu, mais on doit user des medicins lesquelz la sapience commande estre honnorez pour quoy Dieu pour l’humaine necessité pour sa infinie bonté les a creez. Et pourtant au service des malades d’icelle enfermerie soyent deputez medicins (a)ornez de science et practicque, honnestes personnes, expers et graves, lesquelz sont tenuz de faire jurement solennel en presence de huit freres de huit langues et de l’enfermier que bien et diligamment pourveoiront à la santé des malades selon les enseignemens et doctrine des medecins approuvez et(b) diligamment consulteront. Et ce que par eulx [f5r] sera ordonné par commandement d’aulcun ne puisse estre empesché. Lesquelz medecins doyent visiter les malades aux moins deux foiz le jour et doyent complir, excercer et ordonner vigilamment et droictement toutes les choses qui conviennent à la santé des malades selon l’approuvée science des expers medecins. À icelle visitation soyent presens l’enfermier et l’escripvain lequel escripve leaulement, discretement et particulierement tous les remedes declarez par les medecins et ordonnez. Lesquelles choses(b) commandons que sans contradiction soient administrées aux malades. Iceulx medecins doyent prendre leur salaire du commun tresor et d’icelluy soient contens et des malades ne puissent demander ou recevoir aulcune chose.
(b) chose.
Next Hospitalité 10 | Back to the Contents