Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
076-Hospitalité 1
[f2r]
De l’hospitalité
Usaige
i. Que les frères doyent excercer hospitalité
APrès le service divin il n’est chose que plus désirons et soit mise en nostre pensée que selon les louables et anciennes coustumes excercer, observer et faire hospitalité en la quelle sont complies les œuvres de miséricorde, et nostre saulveur Jhesucrist es pauvres est receu et honnoré. La quelle noz majeurs et anciens instituteurs de tout leur cuer ont honnorée et dicelle ont prins nom que nous ont laissé et imposé et – imitateurs des sainctes coustumes du vaillant Judas Machabeus qui pour la adoration d’un Dieu constantement combaty et hospitalité dévotement excerce(a), aussi de Jehan Hircanus, trèsdévot et saige, qui des trésors du sepulcre du roy David prins la Saincte-Cité delivra de siège et fonda l’ospital – ordonnerent pour Jhesucrist excercer les armes et la saincte hospitalité et fonder hospitaulx. Pourtant nous exortons noz religieux que en l’exercice desdites choses à icelles garder soient diligens et doient exécuter ce que à noz prédécesseurs est ordonné et estably ; et ne soient eslongnez de la fontaine de nostre commancement, mais icelle fondation garderons et honnorerons ce que a eselvé nostre ordre à l’estat présent. Et entre tous les aultres hospitaulx [f2v] de nostre ordre par tout le monde constituez et fondez par noz prédécesseurs et les aulmosnez qui par nostre religion se font de cuer et de pensée soit honoré et servy le zenodoche, enfermerie et hospital de Rhodes qui en nostre âge de édifices et palais est complye et orné et fait ; ouquel les malades, de quelque nacion cristienne que soyent, sont receuz et et pensés et aux despens de nostre trésor nourriz(b) et maintenuz et de médicines pourveuz et soustenuz ; et que ledit hospital soit tousjours amplyé en édifices et utensilles et de dons aorné, car Jhesucrist en luy habite eta est honnoré et refectioné ; et aussi la cotidienne aulmosne qui se fait au palais magistral refectionant xiii pauvres chascun jour soit observée ; et les aulmosnes qui se font es huyt haulberges ne doyent par aulcune manière cesser. En oultre soit faicte et aornée la cène que chascun an se fait aulx palais magistral le jeudi de la passion de Jhesucrist en la quelle les maistres, baillifz et prieurs ensuyvant Crist lavant les piedz de xiii pauvres et repaissant habondamment et font dons mesmement. Et aussi soit célébré la cène qui se fait iceluy jour oudit hospital de xiii pauvres en mémoire de la Saincte-Cène de nostre saulveur Jhesucrist et apostres, qui sont repeuz et ornez de dons affin que par ces dévotes œuvres nous soyons renduz aggréables à Dieu qui nous défende de la tirannie des ennemys de la foy catholicque.
(b) nourrir.
Next Hospitalité 2 | Back to the Contents