Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
069-Eglise 36
[e8r]
Frere Baptiste des Ursins maistre
xxxvi. Des commissaires de l’eglise de Saint-Jehan-du-Collac de Rhodes qui doyvent visiter les lieux et possessions
Nous establissons que par le maistre et conseil comply, quant l’exigence des choses regnera, soient ordonnez et esleuz deux commissaires, preudommes religieux desquelz l’un soit prins, pour exercer l’office, de ceulx du conseil ordinaire. Lesquelz deux commissaires avecques le prieur de l’eglise, qui pour le temps sera, avec diligence et sollicitude doyent visiter personnellement les lieux, possessions, maisons appartenans aux chappelles de l’eglise de Saint-Jehan-du-Collac de Rhodes et aux eglises de Saint-Anthoine, Nostre-Dame-de-Philerme, Saint-Jehan-de-la-Fontaine et de toutes les aultres [e8v] constituées en Rhodes appartenans à la jurisdiction de nostre religion ; et que de ce facent inventoire auctentique. Et s’ilz trouveront ruynes, demolitions et devastations desdictes choses et biens meubles et immeubles que iceulx facent edifier, erigir, reparer et augmenter aux despens de ceulx qui les rentes et fruitz desdictes chappelles et eglises reçoipvent. Et se les possesseurs desdictes chapelles et eglises seront refusans et inobediens à faire lesdictez choses que soyent privés de leurs chappelles et rentes d’icelles. Lesquelles soyent données à aultres par ceulx qui en elles ont le droit de patronage affin que les reparations et augmentations soient complyes. Oultre plus lesditz commissaires doibvent prendre et avoir information de la fondation et institution desdictes chappelles et eglises et ayent notice se le service divin est comply selon la volunté et ordonnance des fondateurs. Lesquelles lesditz chappellains soient tenuz complir, aultrement se seront negligens en ce faire soient privez desditez chappelles et eglises, et par collacteurs d’icelles à autres soit pourveu affin que le divin service soit faict. Et lesditez visitations et informations soient mise en escript auctentiquement. Aussi lesditz commissaires facent garder et exequuter tous les establissemens et ordonnances faictes à honneur du divin service et decoration de ladicte eglise. Et les renitens et inobediens soient pugniz selon la teneur des establissemens.