Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
028-Reception 18
[d4v]
Frere Jacques de Milly maistre
xviii. Quelle peine encourent ceulx qui reçoipuent aulcun en frere chevalier contre la forme des establissemens
Il est chose decente que les religeux doyent obeyr aux establissemens, et ceulx qui contrefont sont dignes de pugnition. Pourtant louablement est estably que se les prieurs ou chastellain d’Emposte recevront aulcun en frere chevalier lequel ne sera gentil homme de nom et d’armes, et ne en loyal mariage, et ydoine selon la forme des establissemens incontinent soit privé de l’une de ses chambres prioralles. Et le commandeur qui contrefera soit privé de la commanderie. La quelle chambre ou commanderie appartiengne à la collation de la langue de la quelle sera le delinquant. Et si le contrefaisant sera conventual qu’il ne puist jamais avoir chevissement, mais d’icelluy perpetuellement soit privé. Et les freres qui auront fait la tesmoignance de la ydoneyté, se(a) apres l’opposite sera trouvé, se(b) les tesmoings seront prieurs ou chastellain d’Emposte ou commandeurs que doyent perdre chambre ou commanderie, et s’ilz seront conventuaulx soient pareillement inhabilles à avoir offices, benefices et soldée et doye encourir la vergoigne et peine de parjure. Toutesfois que aulcun prejudice ne puist venir à icelluy qui par vertu desditz tesmoings aura receu aucun en chevalier, mais s’entende estre sans coulpe. En oultre les prieurs et chastellain d’Emposte, commandeurs et freres qui soubz une mesme licence reçoipvent [d5r] plusieurs freres ou chevaliers ou sergens d’armes qui ne sont contenuz en la licence, ou ceulx qui recepvront freres, de quelque degré que ce soit, en nostre religion contre la forme des establissemens doyent cheoir en icelle mesme peine, excepte les cas esquelz les establissemens expressement declairent la peine que doibt estre donnée aux freres contrefaisans.
Next Reception 19 | Back to the Contents
(b) ce.