1478.12.22.

Frater Petrus Daubusson, Dei gracia sacre domus hospitalis Sancti Johannis Jherosolimitani magister humilis ac pauperum Jhesu Christi custos, Et nos Conventus Rhodi domus eiusdem universis et singulis nostras huiusmodi litteras visuris audituris et lecturis, Salutem in domino sempiternam.

Serie presencium notum sit quod ad instanciam et requisicionem religiosi in Christo, nobis carissimi fratris Johannis Renguis, preceptoris de Treves, infra scriptam sentenciam ex actis capituli generalis anno M IIII^c LXXVIII Rhodi celebrati, extrahi explicarique fecimus et in hanc formam redigi huiusmodi sub tenore:

Die XVIIII Decembris M IIII^c LXXVIII. Super differencia vertente inter dominum fratrem Johannem Renguis ac Johannem Farsati racione preceptorie Valisdrome, quam idem frater Johannes Renguis asserit sibi pertinere tamquam unitam preceptorie de Treves, quam unionem invenit post sentenciam latam per reverendissimum dominum magistrum et consilium ordinarium, coram quo protestatus est et reservavit ius suum, si pro futuro unio reperiretur, asserente eodem domino fratre Johanne Farsati, quod super hac differencia sentencia est lata, que non debet retractari secundum formam stabilimentorum cum cognicio fratrum militum et serviencium pro cabimenta spectat reverendissimo domino magistro et reverendo consilio ordinario et fuerunt dati termini competentes ad perquirendum registra eidem fratri Johanni de Renguis, que perquisivit et non invenit eandem unionem. Auditis dictis partibus earumque racionibus intellectis fuit per reverendissimum dominum magistrum et reverendum consilium completum reservacionis capituli generalis cum scrutinio balotarum judicatum et sentenciatum quod dicta preceptoria Valisdrome in vim unionis dudum facte pertinet et spectat ipsi fratri Johanni Renguis racione preceptorie de Treves, cui est unita, non obstante sentencia lata, in qua tunc non apparint de dicta unione.

Et quia hoc extractum cum originali concordatum unum et idem esse invenimus, ideo in fidem et testimonium premissorum bulla nostra communis plumbea presentibus est appensa.

Datum Rhodi in nostro conventu die vigesima secunda mensis Decembris anno ab incarnacione Domini millesimo quadringentesimo septuagesimo octavo.