1423.02.10.

10 February, 1423
Master Antoni Fluvia to the orthodox priest George Zona: grants two churches in the city of Rhodes, Saint Margarita and Saint Sozou, close to Saint George's gate. The priest gains complete disposal of these churches, as had his predecessors. - NLM Arch. 346, fol. 175r. Register. - Z. N. Tsirpanlis (Ed.), Anekdota eggrapha gia te Rodo kai te Noties Sporades apo to archeio to Ioanniton Ippoton [Unpublished Documents concerning Rhodes and the South-East Aegean Islands from the Archives of the Order of St. John], vol. 1: 1421-1453 (Rhodes, 1995), no.10, pp. 234-35.

Frater Anthonius Fluviani, dei gracie sacre domus Hospitalis Sancti Iohannis Iherusalem Magister humilis et pauperum Christi custos, in Christo nobis dilecto pape Iorgi Zona, salutem in domino.

Probitatis et morum merita, quibus apud nos fidedignorum commendaris testimonio nos inducunt, ut personam tuam nostris favore et gratia prosequamur. Hinc est, quod ecclesias Sancte Margarite et Sancti Sozi nostre civitatis Rodi, prope portam Sancti Georgii ipsius civitatis, cum omnibus earum membris, iuribus, actionibus, pertinentiis, oblacionibus, vigiliis et emolumentis ad eas spectantibus et pertinentibus, ac spectare et pertinere debentibus quoquomodo, cum quibus illas habuerunt, tenuerunt et possiderunt alii papates, tui predecessores, ad habendas, ornendas et gerendas, gubernandas et celebrandas, tibi de nostra certa scientia et speciali gratia tenore presencium conferimus, concedimus et donamus, usqe ad nostrum beneplacitum, teque rectorem et gubernatorem dicte ecclesie(a) constituimus hac serie et eciam ordinamus, committentes tibi fiducialiter circa curam, regimen et administracionem dictarum ecclesiarum ac bonorum et iurium earum defensionem, mandantes universis et singulis fratribus domus nostre ciuscumque status, gradus vel condicionis existant, ac aliis personis quibuscumque nobis subditis, ne contra presentem nostram donacionem et graciam aliquatenus venire presumant, quinimo ea, iuxta mentem eius et seriem, studeant inviolabiliter observare.

In cuius rei testimonium bulla nostra comunis plumbea presentibus est appensa.

Datum Rodi in nostro Conventu die X mensis Februarii, anno incarnationis domini MoIIIIcXXII.

___________________________________________

(a) Read: dictarum ecclesiarum.


first adaptation 13.10.2004 Manuela Plener / revised 02.12.2008 Jürgen Sarnowsky /
status: proofread /
for any comments: send me an e-mail Juergen.Sarnowsky@uni-hamburg.de  (Jürgen Sarnowsky)


Back to the Calendar for 1423