1413.01.21.

Wy broeder Johan Cruze balyer toe Westphalen ende commanduer des huses te Wesel s.Johans ordre ende wy gemeene Convents broeders des huses voorss. bekennen voor ons ende onse nakomelingen,

dat wy metten eerbaren broder Arnold van Donen Belier ende commander tot Utrecht etc. eens wessels overcomen syn met goeden beraede, ende om nutticheit onser huser den wij vastelicken holden sullen, to beyden zyden, Alsoe dat het huys tot Utrecht hebben sal alsodane erffenisse ende goede als onse huse leggende heeft inden gestichte ende in Hollant in wat enden die gelegen syn, daer het huse tUtrecht mede geervet syn sal, ende hebben de balyer ende commanduer ende den convent tUtrecht weder voor bewiset ende overgegeven alsodanig erffenisse ende goede als daer sy den huse te Wesel aen {104v} gevestiget heeft gelegen inden karspel van Ingen na uuytwijsen haerder brieve etc.

Alle dese poincten beloven wij etc.

In orcunde heb ic broder Jan Balier ende commendur voor mij ende dat gemeene convent mynen segel aen desen brief doen hangen, ende want het gemeen convent jegenwoirdich geen segel en hevet, so hebben wi omme de meere vestenisse gebeden broder Kaerl van Malden prior, Henric Jordens scaffener des voorss. huses to Wesel eer segelen mede daer an te hangen, des wy etc .

Gegeven int jaer ons Heeren 1413 op s. Agneten dach der hilger joncfrouwen.