1313.05.14.

Universitati vestre tenore presentium patefiat, nos et domum nostram divina disponente clemencia acquisivisse per vim armorum in partibus cismarinis a Grecis cismaticis et Turchis de saracenis inpiis inimicis orthodoxe fidei tam in insulis quam in terra firma castra, villas et fortelliccia, ac terras fertiles et in cunctis fructibus copiosas, que cultu et solacio indigent populi christiani, ad ipsorum Turchorum destructionem et exterminium, et ad exaltacionem fidei orthodoxe. Nos itaque ferventi cupientes desiderio et vias ac modos indagantes quibus ipsas villas castra et terras bonis gentibus ac hominibus nobilibus et aliis de ultramarinis partibus oriundis stabilire et populare possimus qui ipsa loca et terras contra predictos Turchos et Grecos deffendant, ac eis cum vexillo sancte crucis viriliter resistant, et in societate nostra ac procerum domus nostre ipsos dampnificent destruant radicitus et evellant de consilio voluntate et expresso assensu fratrum et procerum domus nostre nobis assistencium duximus ordinandum, ut quibuscumque personis citra mare venire volentibus causa habitandi in locis et terris predictis, ipsa loca et terras in feudum perpetuum concedamus. Et de ipsis terris et locis cuique iuxta statum suum et condicionem talem partem conferamus quod honorifice possint vivere prout qualitas et condicio ipsorum cuiuslibet postulabit. Quocirca universitatem vestram et vestrum quemlibet requirimus et rogamus et vos in domino sollicite exortamur, quatinus pro acquirendo honore et vestrarum animarum salute, ac dictorum inimicorum fidei confusione, et catholice fidei exaltatione, ad nos citra mare ex causa predicta cicius quem poteritis veniatis, et nos ac conventus noster cismarinus de locis et terris precivtis cuilibet vestrum talem partem tribuamus, quod de ea et nobis ac domo predicta merito poteritis contentari, sub modis, formis, et condicionibus infrascriptis.

Promittimus siquidem et convenimus bona fide dare et concedere in feudum perpetuum cuilibet militi et suis heredibus, qui citra mare venire voluerit cum uxore et familia sua causa habitandi in locis et terris que nostre tam in insulis quam in terra firma subiacent dicioni, terras et possessiones que valebunt comuni extimacione in reditibus annuis sexagintaquinque libras Turonenses bone monete vel valorem earundem ad monetam curribilem in insula nostra Rodi. Et si solus venerit sine uxore et familia habebit in redditibus annuis, tam in terris quam in possessionibus feudalibus quinquaginta libras Turonenses bone monete vel valorem earundem in moneta predicta. Et si contingereit ipsum in partibus cismarinis uxorari, habebit feudum militis uxorati. Ita tamen, quod idem miles et successores sui debeant et teneantur tenere secum continue duo animalia videlicet unum bonum et sufficientem equm, et unum ronsinum vel unam mulatiam, ac duos homines pro suo servicio, quorum unus sit homo aptus ad arma.

Et cuilibet nobili, qui non sit miles, qui citra mare venire voluerit, cum uxore et familia sua, causa habitandi in terris et locis predictis, et suis heredibus promittimus et convenimus dare et concedere in feudum perpetuum terras et possessiones, valentes comuni extimacione in redditibus annuis quadraginta libras Turonenses bone monete vel valorem earundem in moneta supradicta, et si contingerit ipsum militem fieri habebit feudum militis, quod superius est expressum. Et si solus venerit sine uxore et familia, habebit in redditibus annuis tam in terris quam in possessionibus feudalibus triginta libras monete predicte, et si in partibus cismarinis uxorem acciperet, habebit pheudum nobilis uxorati, vel militis si miles extiterit tempore matrimonii contrahendi. Item tamen, quod idem nobilis, et successores sui, teneantur et debeant tenere secum continue, unum bonum et sufficientem equm, et unum servientem peditem arbalestarium vel lancearium.

Promittimus etiam et convenimus dare et concedere cuilibet nobili et innobili et suis heredibus, qui citra mare venire voluerit causa habitationis predicte, et secum tenere voluerit unum bonum ronsinum de valore ducentorum Turonensium grossorum argenti supra terras et possesiones in feudum perpetuum valentes comuni extimacione viginti libras Turonenses monete antedicte. Et quilibet serviens pedes, qui occasione predicta citra mare venerit habebit pro se et suis successoribus in reditibus annuis, tam in terris quam possessionibus feudalibus, quindecim libras dicte monete. Et etiam quilibet agricultor qui eadem occasione venerit citra mare habebit in reditibus annuis et eius successores, tam in terris quam possessionibus pheodalibus, tresdecim libras monete eiusdem.

Promittimus etiam insuper et convenimus bona fide prefatis militibus et nobilibus, ac eorum uxoribus familiis et animalibus, ac predictis nobilibus aut innobilibus, qui ronsinum predictum tenebunt, et servientibus peditibus et agricultoribus predictis conpetenter et decenter providere aut provideri facere in victu suo ad expensas nostras et domus per totum unum annum continuum et completum, conputandum a die, qua pactum et convenciones nobiscum federint de remanendo et habitando in locis et terris nostris predictis, et dare seu dari facere puro dono infra dictum annum cuilibet dictorum militum et nobilium, qui equos ut supradictum est tenere debent, unum bonum et sufficientem equm et alia animalia, que ratione dictorum feudorum tenere debebunt et habere.

Volumus tamen quod inter nos et personas predictas per pactum expressum conveniatur et inhiatur convencio, quod ipsi milites et nobiles et alie gentes supra expressate et eorum successores debeant et teneantur sequo nos et proceres dicte domus, quotiens opus fuerit, in facto armorum per totam terram hospitalis, in qua ipsi habitabunt, et per unam dietam extra dictam terram nostram suis propriis sumptibus et expensis. Et si nos aut proceres dicte domus vellemus procedere ad eundum longius nos et domus predicta tenebuntur facere [... ... ...] sumptibus et earum [... ...] necessariis conpetenter providere ad expensas nostras et domus, et ipsis militibus et nobilibus aliisque gentibus stipendia nostra tribuere iuxta qualitatem et conditionem cuiuslibet ipsorum, quamdiu in servicio nostro et domus [... ...], et unam dietam predictam morabunt eundo stando et etiam tradando.

Preterea promittimus et convenimus, quod cuilibet, qui in locis et terris predictis habitare voluerit et tenere continue pro servicio nostro et domus unam galeam de centum duodecim usque ad centum viginti remos paratam et furnitam omnibus suis ycharriis ac apparatibus iuxta usus et consuetudines regni Jerusalem et Cipri, dabimus et concedamus in pheudum perpetuum terras et possessiones valentes annuatim duo milia turonenses grossos argenti, vel mille bisancios de Rodo, de quibus se et dictam galeam valent subsceptare. Et quilibet, qui tenere voluerit in servicio nostro et domus aliud lignum armatum, habebit in reditibus annuis tam in terris quam possessionibus feodalibus pro eodem modo et foro, quo recipiet dicta galea iuxta ipsius ligni magnitudinem et eius remorum quantitatem, quas terras et possesiones, promittimus et convenimus dare et concedere prenominatis personis francas quietas, et liberas, ab omni prestacioni juris et servitutis, excepto quicumque jure ecclesiastico, et omnibus aliis [...] nobis et domui facere tenebuntur racione dictorum pheudorum prout superius est prepactum.

Ceterum promittimus et convenimus dare cuilibet comito galee ad vitam suam qui in insula nostra Rodi, vel in alio loco terrarum dicte domus habitare voluerit et esse in servicio nostro et domus pro stipendiis suis quolibet mense viginti bisancios de Rodo, et quando navigabit triginta bisancios. Et cuilibet naucherio decem bisancios quolibet mense pro stipendiis suis ad vitam suam, et quando navigabit pro servicio dicte domus quindecim bisancios. Item quilibet galiotus qui ad insulam nostram Rodi veniet, ab instanti mense Augusti inantea, causa habitandi in eadem habebit et recipiat quolibet mense quando navigabit in servicio nostro et domus stipendia que dabimus aliis galiotis, et quando non navigabit habebit continue et recipiet a nobis et domo suam panaticam pro substentacione sue vite.

In quorum omnium testimonium et certitudinem bulla nostra plunbea presentibus est appensa.