1494.12.30.

In godes namen amen.

Ik, Roleff Ostorp, begrepen mit lifliker krancheid, doch van der gnade godes vulmechtich alle myner sinne, vornuft und redelicheid, hebbe gesettet unde maket myn testament unde lesten willen in nabescreven[er] wise.

Interste alse ik na godes willen vorsterve, so bevele ik myne armen sundigen sele in de barmharticheid des almechtigen godes, der vorbiddinge siner hochwerdigesten moder Marien und aller hilligen unde begere, mynen licham cristliker wise tobegravende unde mii herliken tobegande, unde neme dat uppe de stunde mynes dodes, dat ik nen erffgud entfangen hebbe. Men wes ik hebbe unde nalate an gudern, hebbe ik mit mynen eeliken husfrouwen befriget und mit flitiger neringe vorworven. Dar van geve ik interste dem gemenen gude achte schillingh to wegen unde stegen.

Item so geve ik mynem sonen, Diderike, twintich mark geldes jarliker rente, so ik de em ok in der stad Hamborgh renteboke alrede toscr[ev]en laten hebbe in dessen nascr[ev]en erven: alse teyn mark in Ludeken Furhaken erve vor dem Winserbom unde teyn mark in mynem erve, dar ik innewone by dem Hoppenmarkede belegen. Dar to geve ik em enen sulverne beker unde veer sulvern lepele. Men vorstorve he in sinen kintliken jarn, so scholden sodan[e] beker unde lepele wedderkomen an myne eeliken husfrouwen, Kat[r]inen, unde unser beider kind, Anneken, unde dar by bliven. Ok schal myn eelike husfrouwe erben[omet], isset dat ik vorsterve, em in den ersten dren jaren nene rente geven, men se schal ene alleyne mit cledern unde schon besorgen, wes he der behoved. Unde demsulven mynem sonen sette unde kese ik to vormundern de ersamen und vorsichtigen mann[e], hern Johann Berscampen, radmanne, Hinrike Hoppensteden, Ludeken Furhaken unde Hanß Ruwen, so ik de em ok in vortiden to vormundern alrede gesettet unde koren hebbe. Ok schal Anneke, unser beider kind, drehundert mark hebben uthen redesten gudern dergeliken. Item de dre mark geldes, de ik hebbe in Wichman Dreigers boden uppe dem broke, de schal hebben unde rouweliken beholden myn vilgenan[te] husfrouwe, Kather[i]ne, wente ik mynem sonen Diderike erben[omet] wolde dre mark geldes gekortet unde em alleyne soventeyn mark geldes gegeven hebben. Nu mach he de vorgesechten twintich mark geldes, em gescre[ve]n, tosamende unvormynret rouweliken beholden. Jodoch so schal de ersame rad to Hamborg in dessen giften und testamente eres rechtes unvorsumet wesen.

Unde dat to warende und myne testamentarese towesende, kese ik de ersamen unde vorsichtigen manne, hern Johann Berscamp, radmanne, unde Hermen Vortmann, borger to Hamborgh, se frundliken biddende desset antonemende und toschickende, so ik ene wol getruwe. Wil ok, dat desset myn testament unde lateste wille unvorbroken geholden werde, idzy denn, dat ik dat mundliken unde witliken wedderrope. Hir an unde aver hebben gewesen de erbarn hern, her Johan Berscamp unde her Hinrik Moller, radmanne to Hamborgh, van dem erliken rade darsulves hir sundergen togevoget, sik des tovordenkende. To orkunde unde tughnisse sint desser testamente unde scrifte twe enes ludes eyn uthem andern aver dat word amen gesneden, der eyn by dem rade unde dat ander by mynen testamentaresen und eeliken husfrouwen sin in vorwaringe.