1494.10.13.

In godes namen amen.

Ick, Greteke, ßelighen mester Johan Valentin nalaten wedewe, hebbe avertrachtet de ghebrekelicheit der mynschliken nature, so dat ick alze alle mynschen des naturliken dodes yo sterven moth unde doch nicht kan weten de tiid efte stunde des dodes. Hyrumme dat my de dodt nicht unvorsichtliken avervalle, unde up dat na mynem dode neyn werre, kiif efte vordreth van mynen tiidliken guderen yrrisen efte upstan en derve, so sette ick tovoren myth willen unde vulbord myner unde myner dochter Magdalenen vormunder, Hinrick Moller, Marquard Hannebolen unde Ghisebertus van Houwennighe, myn testement unde lesten willen in desser naschreven wise.

Interste bevele ick myne armen zele in de barmeherticheit des almechtighen gades, vorbiddinghe der hilgen juncfrouwen Marien unde alle gades hilgen unde boghere, dat myne testementarii my na mynem dode erliken began unde begraven laten na der stad Hamborgh wontliker wise, und neme dat up de lesten stunde mynes dodes, dat ick van mynen baren vrunden nenerleige erfgudt entfanghen hebbe. Sunder wes ick hebbe van tiidliken guderen, hebbe ick myt mynem zelighen manne vorbenomet ghenamen, unde alse uns god vormyddelst unseme vlitighen arbeide myldichliken vorlenet heft. Unde dar van gheve ick interste achte schillingh penningh to weghen unde steghen. Unde ofte myn dochter Magdalene storve ane erven van er ghetelet, so schal dat meyne gudt noch hebben soß marck geldes, de nu synd in Hinrick Mollers huß by deme Schare. Item Metke, myn suster, schal hebben teyn rinsche gulden.

Item gheve ick Gheseken, myner maghet, enen gronen hoyken, enen blawen rock unde enen grawen rock unde mynen under rock. Item gheve ick Hinrick Mollers frouwen mynen swarten besten arreschen hoiken. Item gheve ick Marquard Hannebolen frouwen enen roden arreschen hoiken ane smyde. Item gheve ick Wichmans frouwen van der Vechte ene swarte borden umbeslaghen unde eyn toniges cruce van golde. Item gheve ick Hinrick Mollers dochter eyn byndeken, dat se nu heft, unde ene borden umbeslaghen. Item gheve ick Wilhelmus, deme knechte uppe der abbeteken, dre stucke pagineret, dat myn sone maket heft. Item gheve ick mester Johann Remsteden eyn pagineret cruce in ener tafelen. Item gheve ick her Johann Roßen eyn ander pagineret cruce. Vortmer efte Magdalene, myn dochter, vorstorve ane erven van er ghebaren, so schal Hinrick Moller hebben twe marck geldes unde Marquard Hannebole schal hebben twe marck geldes. Unde twe marck geldes schalme gheven in de ere gades na guddunckynghe myner testementarii. Unde Metke, myn suster, schal hebben veftich rynsche guldenn. Unde Engelke, mynes vaders broder, schal hebben soß rynsche gulden uth den redesten guderen. Wes denne dar vurder averblift van tiidliken guderen, wo de syn, efte wo me de nomen mach, scholen de testamentarii gheven in de ere gades.

Unde dyth testement to vorstande unde mynen lesten willen vullentobringhende, sette unde kese ick de ersamen Hinrick Moller, Marquard Hannebolen unde Ghisebertus van Houwennighe, borgher tho Hamborgh, unde boghere, dat se dath willen annemen unde so vorstan, alse ick en wol to truwe. Unde efte erer eyn vorstorve, so scholen de anderen enen fromen man wedder kezen in de stede des doden, so vaken des to donde ys. Ok wil ick, dat dyth testement by vuller macht blyve so langhe, dat ick dat mundliken wedderope. Hyr synd mede an unde aver wesen de ersamen her Detleff Bremer unde her Hermen Rodemborgh, radmanne van deme rade sunderghes hir to ghevoghet, sick to vordenckende. To merer tuchnisse synt desser testemente twe allens ludes dat ene uthe deme anderen sneden aver dat word trinitas, der dat ene ys by deme rade unde dat ander by my unde mynen testementarien in vorwaringhe.