1494.08.27.

In godes namen amen.

Ik, Gerdt van Verden, borgher to Hamborgh, by wolmacht mynes levendes, vulmechtich myner wetenheit, vornuft und redelicheit, hebbe avertrachtet de gebrekelicheit der mynschliken nature, so dat ik alse alle mynschen des naturliken dodes yo sterven mot und doch nicht en weth de tiid efte stunde des dodes. Hirumme dat my de dod nicht unvorsichtliken avervalle, und up dat nen werre, kyf edder ander vordreth na mynem dode in beswaringe myner armen sele dorve irrisen und upstan van myner tiidliken guder wegen, so sette ik tovorn myn testement und lesten willen in desser nascreven wise.

Interste bevele ik myne armen sele inde barmherticheit des almechtigen godes, vorbiddinge der iuncfrouwen Marien und alle godes hilgen und beghere, dat myne testementarii my na mynem dode erliken begraven und began laten na wontliker wise der stad Hamborgh, und neme dat uppe de latesten stunde mynes dodes, dat ik nenerleige erfgud entfangen hebbe. Sunder wes ik hebbe van tiidliken guderen, de heft my god vormiddelst siner gnade, hulpe Hanses, mynes broders, und mynem vlitigen arbeide mildichliken vorlenet.

Und dar van gheve ik interste achte lubekesche schillinge to wegen und steghen. Vortmer gheve ik Hanse, mynem broder, und sinen kinderen alle myne gudere, de ik nalatende werde na mynem dode, se sin klene efte grot, wo se syn, und wo me se nomen mach, nichtes uthgenomen, alze gifte und nicht alse erfgud.

Und dit testement to vorstande und mynen lesten willen mede vullen to bringende, sette und kese ik de vorsichtigen Kersten Los, Hans van Verden und Hans Schomaker, borgher to Hamborgh, und begher[e], dat se dat willen annamen, wan de tiidt kumpt, und also vorstan, alse ik en wol totruwe. Und eft erer eyn vorstorve, so scholen de andern vullenkomen macht hebben, enen anderen fromen man wedder to kesende inde stede des doden, so vaken des to donde ys.

Ok wil ik, dat dit testement by vuller macht blyve so lange, dat ik dat muntliken wedderrope. Unde in dessem testemente schal de erlike rad to Hamborgh erer stad recht unvorsumeth wesen. Hir sint mede an und aver wesen de ersamen her Johan Berscampe und her Albert Westede, radmanne van dem rade sundergen hirto gevoget, sik tovordenckende.