1494.06.21.

In gades namen amen.

Ick Kunneke, ßelighen Arndt Scroders nalaten wedewe, hebbe avertrachtet de ghebrekelicheit der mynschliken nature, so dat ick alze alle mynschen des naturliken dodes yo sterven moth. Hyrumme dat my de doth nicht unvorsichtliken avervalle, so sette ick myt willen unde vulborde myner naschreven vormundere unde testementarien myn testement unde lesten willen in desser naschreven wiße. Interste bevele ick myne armen zele in de barmeherticheit des almechtighen gades, vorbiddinghe der juncfrouwen Marien unde alle gades hilgen unde neme dat upp de lesten stunde mynes dodes, dat ick baven sodane gudere, alze ick myt Arndt Scrodere, mynem ßelighen manne, nam, nenerleige erfgudere entfanghen hebbe. Des hebbe ick my myt Arndes frunden to erer noghe fruntliken vorliket.

Aldus gheve ick interste van mynen tiidliken guderen achte lubesche schillinghe tho weghen unde steghen. Vortmer gheve ick Hans Schulten eyn handvath, enen ketel unde enen sulveren lepel. Item gheve ick Wommelken, Magdalenen unde Katherinen, Hans Scroders dochteren, de sulvernen schalen, de se my gheven in vorganghen tyden, unde malk enen sulveren lepele. Item Eggert Meiger, deme jungheren, enen sulveren lepele. Item Titken Wigen enen sulveren lepele unde siner husfrouwen mynen besten brunen hoyken unde den brunen rock, de dar tohoret. Item mynen korten swarten hoyken schal hebben myn vadder, Titken Wigen ßone. Item Gheseken Steenbrugghers myne[n] aldages hoiken.

Item soes marck penninghe to sunte Peter to deme buwte. Item enen sulveren lepel her Johanne Moller, deme cappellane to sunte Peter. Item two^elff marck penninghe her Johanne Reyneken. Item schalme upp myn ßarck legghen mynen neghesten besten hoiken unde myn krallen veftich. Dat veftich schal beholden unse leve frouwe, unde den hoiken schal hebben de broderschop unser leven frouwen der kronynghe to deme dome unde sunte Margarete.

Ock boghere ick, dat my myne testementarii erliken began laten na wontliker wise der stad Hamborgh. Wes ick denne furder nalate van tiitliken guderen, de gheve ick Eggert Meiger, dem elderen. Unde dyth testemente to vorstande unde mynen lesten willen vullenthobringhende, sette ick unde kese de ersamen Hans Schulten, Eggert Meiger, den elderen, Eggert Meiger, den jungheren, unde Titken Wigen, borghere tho Hamborgh, unde beghere, dat se dat willen annemen, wan de tiid kumpt, unde alzo vorstan, alze ick en wol to truwe, unde wil, dat dyth testemente by vullermacht blyve so langhe, [dat] ick dat mundliken wedder rope. Ock schal de erlike radt tho Hamborgh van desses testementes weghen erer stad rechtes unvorsumet wesen. Hyr sindt mede an unde aver wesen de ersamen her Cordt Moller unde her Hermen Rodemborgh, radmanne van deme rade sunderghes dar toghefoghet, sick to vordenckende.

To merer tuchnisse sindt desser testemente twe allens ludes, dat ene uth deme anderen sneden aver dat word trinitas, der dat ene ys by deme rade, unde dat ander by my unde mynen testementariesen in vorwaringhe.