1494.04.05.

In gades namen amen.

Ick Gerd Schomaker, borgher to Hamborgh, in kranckheit bevallen, doch byn ick vulmechtich myner redelicheit, witte unde synne, des god ewichliken ghelavet sy, hebbe avertrachtet de ghebrekelicheit der mynschliken nature, so dat ick alse alle mynschen des naturliken dodes yo sterven moth. Hirumme dat my de do^et nicht unvorsichtliken avervalle, so sette ick myn testement in desser naschreven wise. Interste neme ick dat uppe myne lesten stunde des dodes, dat ick baven sodane gudere, alse ick myt Metken, myner husfrouwen, mede ghenamen hebbe, nenerleyge erfgud hebbe entfanghen. Wente sodane gudere, alse ick van mynen elderen hebben scholde, de leth ick Katherinen Krouwels, myner suster, de nu myn negeste ys.

So gheve ick interste achte schillingh to weghen unde stegen deme menen gude. Vortmer schal Metke, myn husfrouwe, tovoren hebben dat beste bedde myt alle siner tobehoringhe, alle ere kledere, smyde, legghe, veftich unde alle, dat se to ereme lyve plecht to dreghende, nichtes uthgenamen. Item alle ere rede gelt, lenewand, laken unde ere kisten. Wes dar denne averblift, dar schal yd umme gan, alse to Hamborgh stad recht is.

Unde dith testament mede vullentobringhende, sette unde kese ick de vorsichtighen Hermen Bodeker unde Hartman He^esterbergh, borghere tho Hamborgh, und gheve en vullenkamen macht, efte erer eyn vorstorve, dat de ander mach enen framen man wedder kesen in de stede des doden, so vaken des to donde ys. Unde in desseme testamente schal de erlike rad to Hamborgh erer stad rechtes unvorsumet wesen. Ock wil ick, dat dith testement by vullermacht blyve so langhe, dat ick dat mundliken wedder rope. Hyr sinth mede an unde aver wesen de ersamen her Cord Moller unde her Hermen Rodenborgh, radmanne van deme rade sunderghes dar to ghevoghet, sick to vordenckende. To merer tuchnisse sinth desser testemente twe allens ludes, dat ene uth deme anderen sneden aver dat word misericordia, der dat ene ys by deme rade, unde dat ander by my unde mynen testamentariesen in vorwaringhe.