1493.06.26.

In godes namen amen.

Ik Jurgen Tzabel, borger to Hamborch, allenen dat ik nu tor tiid krenklik bin an mynem live, jodoch so bin ik myner synne unde redelicheit vulmechtich, des god en ewich lof, hebbe myt rechter witte, synne unde vornuft betrachtet unde overgedacht de gebreklicheit des mynschliken levendes, also dat ik yo so alle mynschen des naturliken dodes sterven mo^et unde doch nicht kan geweten, wo unde wannere. Hiirumme uppe dat my de doth nicht unvorsichtigen overvalle, unde ock dat neyn wer, kiif noch vordreet dorve upstan unde irrisen van wegene myner nalatene gudere, de my van nenen erfliken anvalle tokomen sint - men wes ik hebbe van guderen unde nalate, dat sint myne wolwunnen gudere, also de my god vormyddelst mynem sorchvoldigen, suren, swaren arbeide vorlenet heft, also ik dat neme uppe de stunde mynes dodes, dat ik nenerleie ervegud upgeboret unde entfangen hebbe -, so sette ik tovoren duth myn testament unde latesten willen in desser nascrevenen wise.

Denne interste baven alle so bevele ik myne armen sele in de mylden barmherticheit godes, vorbiddinge der iuncvrowen Marien unde aller hilgen unde begere, dat my myne nageschreven testamentarii na wontliker wise unde wonheit dusser erentriker stad mynen licham to der erden bestedigen laten, wen ik na dem willen godes bin vorstorven, god geve saligen.

Dar negest geve ik to wege unde to stege achte schillinge penninge.

Vurder geve ik in de ere godes tho sunte Johanse unde to allen veer kerspel kerken elker dre mark penninghe, to sunte Marien Magdalenen viif mark penninge to dem buwe.

Item scal men my na don desse nascrevenen selebade: to dem kornstaven een, to dem burstade een, to der langenbrugge een, to dem katrepel een. Unde to enem iewelken selebade schal men don anderhalve tunne bers. Unde to sunte Jurien den armen seken een selebat unde dar to ene halve tunne bers.

Item geve ik mynem sone Sixto negen mark geldes. Geve ok myner maget Gesken dre mark geldes uth mynen redesten guderen.

Geve noch vurder sunte Vincencius broderschop to sunte Katherinen viif mark penninge, sunte Silvesters broderschop to sunte Marien Magdalenen viif mark penninge.

Item geve ik her Clawes Mychelis lutteken maget viif mark penninge. Item Cord van Wintems siner maget, Gesken Pinxstvosses, veer mark penninge. Noch der Wulveschen maget veer mark penninge. Item Arnd van Locken maget veer mark penninge. Item Tilen Everdes vrowen eren beiden megeden elker veer mark penninge. Item geve ik Heynen Hanse unde Jachym Tzabel, mynem broderen, elkem tein mark penninge.

Wes denne, wen dusse gifte alle scheen unde gegeven syn, overblivet van mynen guderen, de ik nalate, it si an korne, an schulden, wor ane dat si, wo men dat heten efte nomen wille, geve ik mynem sone Sixto unde myner maget Gesken tosamende unde wil, dat dit testament unde myn leste wille stede, vast unde unvorbroke geholden werde, also lange dat ik dat redeliken wedderrope.

Dut myn testament unde latesten willen to vorstande [unde] vultobringende, sette ik unde kese de ersamen manne, hernn Clawes Mychels, radmanne, Jasper Lettin, Reyneke Zegelken unde Pawel Moller, mynen guden frunde. Wille, wen erer eyn vorstervet, dat de anderen dre schullen unde moghen eynen anderen vromen man wedder to sik kesen in des doden stede, so vakene des noth unde behoff wert sinde. Ok schal de erlike rad dusser stad hiir ane alle eres rechtes unvorsumet wesen. Hiir sint ane unde over gewesen de ersamen hernn, Johan Berschampe unde her Hinrik Vaget, radmanne van deme rade dar sunderges togevoget, sik des to vordenkende. To groterer tuchnisse is dusser testamente twe alleynes ludende, dat ene uth deme anderen gesneden dorch dat word salicheit, der dat ene is bi deme rade unde dat andere bi mynen testamentarien in vorwaringe.