1493.04.11.

In gades namen amen.

Ick Rotert ten Westerick, swaren dener der stadt Hamborgh, by wolmacht myner wetenheit, vornuft unde redelicheit, hebbe avertrachtet de ghebrekelicheit der mynschliken nature, so dat ick alze alle mynschen des naturliken dodes yo sterven moeth unde nicht en weth de tiid efte stunde des dodes. Hyrumme dat my de do^et nicht unvorsichtigen avervalle, so sette ick tovoren myn testemente unde lesten willen in desser naschreven wise.

Interste bevele ick myne armen zele in de barmeherticheit des almechtigen gades, vorbiddinghe der juncfrouwen Marien unde alle gades hilgen unde neme dat up de lesten stunde mynes dodes, dat ick baven sodane gud, dat my frame lude myt Gheseken, myner eliken husfrouwen, mede gheven hebben, nenerleige erfgud entfangen hebbe. Wes ick anders hebbe unde nalate, hefft my god almechtich vormiddelst myneme unde myner husfrouwen vlitigemm denste unde arbeide myldichliken vorlenet.

Unde dar van gheve ick interste achte lubesche schillinghe to wegen unde steghen.

Vortmer umme grotes horsames, sunderlike leve, vruntschop unde vlites willen, by my van Gheseken, myner eliken husfrouwen ghetoget unde bewiset, so gheve ick er alle myne gudere, de ick nalatende werde na myneme dode, de syn luttick edder grodt, wo me de nomen mach, dar nichtes buten bescheden sunder myne erven unde enes ydermannes insegghent.

Desgeliken sette ick Gheseke, des vorbenomeden Rotters elike husfrouwe, myn testemente unde lesten willen unde neme dat uppe myne lesten hennevard, dat ick baven sodane gudere, alze ick myt Roterde, myneme eliken manne, mede krech unde my van vramen luden gheven worden, nenerleige erfgud entfangen hebbe.

Unde so gheve ick achte schillingh lubesch van myneme dele to wegen unde stegen.

Unde al wes my to kumpt van nalaten guderen na myneme dode, wo me de nomen mach, nichtes uthgenamen, gheve ick Roterde, myneme eliken manne, der to brukende to sineme besten de tiid sines levendes sunder yenigerleyge weddersprake. Vortmer wille wy Roterd unde Gheseke vorbenomet, wanner dat de lateste van uns beiden na deme willen gades vorstorven ys, wes dar denne averblift van tiidliken guderen, wan de bygraft na wontliker wise ghescheen is, de gudere, wo de syn, schollen hebben de ersame her Otte Wammere unde syne erven sunder alle gheverde.
Unde dit testement to vorstande unde unsen lesten willen mede vullentobringende, setten unde kesen wy de ersamen Laurens Wammere unde Symon Ruter, borgher to Hamborgh, unde begheren, dat se dat willen annemen, wan de tiid kumpt, unde alzo vorstan, alze wy en wol to truwen, unde gheven en vullenkamen macht, wan erer eyn vorstervet, dat de ander mach enen framen man wedderkesen in de stede des doden, so vaken des to donde is. Ock wille wy, dat dit testement by vuller macht blive, so langhe dat wy dat muntliken wedderropen. Unde in desseme testemente schal de erlike rad to Hamborgh erer stad rechtes unvorsumet wesen. Hyr sindt mede an unde aver wesen de ersamen her Otte Wammere unde her Detleff Bremer, radmanne van deme rade sunderghes dar to ghevoghet.

To merer tuchnisse sindt desser testemente twe allens ludes, dat ene uth deme anderen sneden aver dat wordt salus, der dat ene is by deme rade to Hamborgh unde dat ander by uns unde unsen testementariesen in vorwaringhe.