1492.09.12.

In gades namen amen.

Ick Gelle van der Munte, borgher tho Hamborgh, wol dat ick in kranckheit bevallen byn, so byn ick doch vulmechtich myner synne unde witte unde redelicheit, des god ewichliken ghelavet sy, hebbe averghetrachtet de ghebrekelicheit der mynschliken nature, so dat ick alse alle mynschen des naturliken dodes yo sterven moth unde doch nicht en weth de tiid efte stunde des dodes.

Hirumme dat my de dod nicht unvorsichtliken avervalle, unde uppe dat nen werre, kiif edder ander vordreth na mynem dode inbeswaringe myner armen zele dorve yrrisen unde upstan, so setthe ick tovoren myn testement unde lesten willen in desser naschreven wyse.

Interste bevele ick myne armen zele inde barmeherticheit des almechtigen gades, vorbiddinge der juncfrouwen Marien unde alle gades hilgen unde neme dat uppe de stunde mynes dodes, dat ick baven de gudere, de ick myt Alken, myner eeliken husfrouwen, mede namen hebbe, nenerleige erfgud entfanghen hebbe. Alle myne anderen gudere, de ick hebbe unde nalatende werde, heft my god almechtich dorch mynem unde myner husfrouwen flitigen unde sorchfoldigem arbeide myldichliken vorlenet.

Dar van gheve ick achte schillingh penningh tho wegen unde stegen.

Item Geseken Gerdes twe mark geldes. Item teyn mark penningh nannen frouwen tho Osterhusen. Item Karstynen Volschen ene marck geldes.

Item vortmer umme grotes horsames, sunderliker leve, vruntschop unde vlites willen, by my van myner leven husfrouwen, Alken, betoghet unde bewiset, so gheve ick er alle myne anderen gudere, bewechlick unde unbewechlick, wo ick de nalatende werde na mynem dode, alse huß, hoff, kledere, klenade, ingedomete, smyde unde hußgeradt, so dat is in huß unde have, wome dat nomen mach, nichtes uthgenamen, des to brukende de tiid eres levendes sunder myne erven unde enes ydermans insegghent.

Desgeliken setthe ick, Alke, des vorbenomeden Gellen eelike husfrouwe, myn testemente in desser naschreven wise. Interste neme ick dat uppe de stunde mynes dodes, dat ick baven sodane gudere, alse ick myt Gellen, mynem eeliken manne, medegenamen unde tosamen vorworven hebben, baven veftich lubeschk marck van erfguderen nicht entfanghen hebbe. Dar vor scholen myne negesten erven hebben veftich lubeschk marck.

Item so gheve ick achte schillingh penningh to wegen unde stegen. Vortmer gheve ick vefteyn marck penningh Hinrick van der Banck. Vortmer gheve ick alle myne anderen nalatende gudere, bewechlick unde unbewechlick, wo se sindt, dar nicht uthgenamen, Gellen, mynem eeliken manne, der to brukende de tiid sines levendes na sinem willen.

Wanner aver wy vorbenomeden, Gelle unde Alke, beide van dodes weghen vorby syn, so scholen unse naschreven testementarii gheven achte marck geldes van unsen nalaten guderen to sunte Katherinen to dem buwete unde achte mark geldes to sunte Nicolaus to dem buwete unde achte marck geldes to sunte Peter to dem buwete unde achte marck geldes to sunte Jacob to dem buwete.

Item twe mark geldes to sunte Johanse to wyne unde brode. Item twe marck geldes to sunte Marien Magdalenen to wyne unde to brode. Wes denne dar furder averblift, scholen unse testementarii gheven to der ere gades na erem guddunckende.

Unde desse testemente unde unsen lesten willen vullentobringende, kese wy de vorsichtigen manne, Hinrick Brandes unde Goteken Wreden, borgher to Hamborgh, unde begheren, dat se dat willen annemen, wen de tiid kumpt, unde also vorstan, alse wy en des wol to truwen. Unde efte erer eyn vorstorve, so schal de ander vullenkamen macht hebben, enen framen man wedder to kesende in de stede des doden, so vaken des to donde werd. Vortmer wille wy, dat dith testement by vullermacht blyve so lange, dat wy dat muntliken wedder ropen. Unde in dessem testemente schal de erlike radt to Hamborgh erer stadt rechtes unvorsumet wesen.

Hyr sindt mede an unde aver wesen de ersamen heren, Hermen Bekendorpe unde her Clawes Michelßen, radmanne vandem rade sunderghes dar to gevoget, sick to vordenckende. To groter tuchnisse desser testemente twe allens ludes dat ene uth dem anderen sneden aver dat word salus, der dat ene is by dem rade unde dat ander by uns unde unsen testementarien in vorwaringe.