1492.08.26.
In godes namen amen.
Ick Greteke Meygers, borghersche tho Hamborgh, wol dat ick in kranckheit bevallen byn, so byn ick doch vulmechtich myner witte unde redelicheit, hebbe avertrachtet de ghebrekelicheit der mynschlike nature, so dat ick alse alle mynschen des naturliken dodes yo sterven moeth unde doch nicht enweth de tiid efte stunde des dodes. Hyrumme dat my de doet nicht unvorsichtliken avervalle unde uppe dat neyn werre, kiiff edder ander vordreet na mynem dode inbeswaringe myner armen zele dorve yrrisen unde upstan, so sette ick tovorenn myn testement unde lesten willen in desser naschreven wise.
Interste bevele ick myne armen zele inde barmeherticheit des almechtigen gades, vorbiddinghe der juncfrouwen Marien unde alle gades hilgen unde neme dat up de stunde mynes dodes, dat ick baven de gudere, de ick myt mynen ßeligen mannen ghenamen unde delinghe affgedaen hebbe, nicht baven achtentich lubesche marck van erfguderen entfanghen hebbe. Dar vor scholen doch myne negesten erven hebben hundert lubesche marck.
Item so gheve ick achte schillingh to weghen unde steghen. Item so gheve ick Alken Rusken druttich marck pennynghe unde veer marck geldes eren kinderen.
Item to sunte Johanse unde to sunte Marien Magdalenen in yslick kloster twe marck geldes to wyne unde brode.
Item Werneken Rosken dochter twe par laken van veerdehalven scrode unde eyn gastebedde. Item Syvert Hermens unde sinen susteren dre marck geldes. Item Greteken van Reddinghe unde eren kinderen teyn marck geldes unde myn beste bedde myt den besten laken unde mit den neghesten besten unde myt dem pole unde myt den kussen unde myn beste par kleder myt deme smyde. Item Metken, erer dochter, eyn rocksmyde, veer stucke dat luttikeste unde mynen brunen besten ßuben. Item Gesken Hildebrandes dochter eyn par laken van veerdehalve scroden, alse ick se bruket hebbe. Item Eler, mynem knechte, soeß marck penninghe. Item dat ander, dat se nedden vor dem hoyken heft, dat schal hebben Symon van Reddinghes dochter Metke. Item myn beste par kleder myt dem smyde dat schal hebben myner suster dochter Gretke.
Item myne brune feilen de schal hebben sunte Nicolaus myt den runden knopen unde eyn kobbelith. Item Alken Lupes mynen besten pyls unde mynen besten swarten hoyken unde mynen brunen daghelkes rock. Item mynen roden ßuben to sunte Johanse to dem buwete to hulpe. Item myn grote spaen, dat is van sulver, dat schal inde kercken, dar ick ghebaren byn tho Reden, myt enem ryvytkenn legghe, dat schal de moder gades hebben. Item mynen groten luchter tho Nygensteden vor de moder gades. Item den anderen luchter schal hebben sunte Anscharius to Eppendorpe.
Item mynen gronen sondaghes hoiken, de licht in dem klederschappe, den schal hebben Hartighes maghet Metke. Item myn maghet Ilsebe schal hebben mynen roden rock myt vlugheren unde mynen gronen hoiken sunder den kraghen unde soeß marck pennynghe unde eyn par laken van veederhalve scroden unde myne besten deken, de up mynem bedde plecht tho liggende. Item veer syden kussen de schal Gretken van Reddinghe maget, Gretke, hebben. Item eyn krallen veftich schal hebben unse leve frouwe tho sunte Nicolaus. Item vortmer so schalme maken laten enen kelk unde gheven in de ere gades, dar des best behoff ys. Item den besten vleschkgrapen schal hebben Gretke van Reden. Unde wes denne vurder averblift unvorgheven van mynen tydliken guderen, scholen myne testamentarii keren to der ere gades na erem guddunckende.
Unde dyth testament mede vullentobringende, setthe unde kese ick de ersamen Hinrick Brand unde Symon Reddingh, borgher tho Hamborgh, unde boghere, dat se dat willen annamen, wan de tiid kumpt, unde also vorstan alse ick en wol to truwe. Unde efte erer eyn vorstorve, so schal de ander vullenkamen macht hebben, enen framen man wedder to kesende in de stede des doden, so vaken des to donde werdt. Vortmer wille ick, dat dyth testement by vullermacht blyve so langhe, dat ick dat muntliken wedder rope. Unde in dessem testemente schal de erlike raed to Hamborgh erer stadt rechte unvorsumet wesen.
Hyr sindt mede an unde aver wesen de ersamen heren Clawes Michelß unde her Hinrick Moller, radmanne van dem rade sunderghes dar to ghevoghet, sick to vordenckende. To groter tuchnisse desser testemente twe allens ludes dat ene uth dem anderen sneden aver dat word misericordia, der dat ene is by dem rade unde dat ander by mynen testementarien in vorwaringhe.
Unde is ghescheen na der bord Cristi unses hernn dusent veerhundert indem tweundeneghentigesten jare des Sondaghes na sunte Bartolomeus dage, des hilgen apostels.
___________________________________________
erste Anlage 04.03.2004 Mathias Nagel / letzte Bearbeitung 04.01.2009 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1492