1492.07.20.

1492 Juli 20. Hamburg.
Regest: Testament von Katherina Wessel.
Überlieferung: StAHH, Classis X Vol.4 Series I 1492 VII. 20.
Beschreibung: Kerbschnitturkunde auf Pergament. Vermerk von alter Hand auf Rückseite:
Testamentum Katherina Wessels sowie die Jahreszahl 1492 von späterer Hand. Edition: --.

In godes namen amen.

Ik Katherina, zeligen Ludken Wessels, wandages borger to Hamborgh, nalatenn wedewe, krenklik van levende, jodoch vulmechtich al myner synne unde redelicheit, god sy gelovet, hebbe sorchvoldigen overtrachtet de wandelbarheit unde gebrek der mynschliken nature, so dat ik alse alle mynschen des naturliken dodes io storven mot, weth doch nicht, wo unde wanner god vam hemmele my esschende wart. Hir umme hebbe ik tovorn desset myn testament unde lesten willen myt willen unde vulborde myner rechten erven, Bernd van Wintemß kindern, geborenn van myner suster Sileken dochter dochter Beken, dorch vulmechtige vormundere dersulven kinder, Cord van Wintem unde Werner Buneken, vor dem ersamen hern Johann Huge, borgermester to Hamborgh, derhalven vulmechtich, gemaket.

Interste so bevele ik myn armen sundigen selen der barmherticheit godes, vorbiddinge siner benedieden moder Marie unde aller hilligen unde begere, mynen licham cristliker wise to begravende unde my erliken na desse stad wonheit to begande, unde geve int erste dem gemenen gude to wegen unde stegen veer lubesche mark pennighe.

Item so geve ik druchtich mark penninge Anneken, herrn Wessels dochter, im kloster to Plone, dar inne synt elven lubesche mark betalet. Item so geve ik int kloster to Lubike, genomet im Segeborger convente, vofteyn lubesche mark penninge. Item ene mark geldes int kloster to Utersten. Item ene mark geldes int kloster to Hervestehude. Item ene mark geldes dem gebuete to sunte Nicolaweße unde ene mark geldes dem vicariiesen dar sulves vor begengknisse mines dochter mannes, Hinrik van Nortems. Item der kerken to sunte Katherinen minen besten hoiken unde teyn lubesche mark penninge unde dem vicariiesen dar sulves twe mark geldes vor begengknisse myner oldern unde myne. To sunte Marien Magdalenen dre mark penninge den brodern.

Item Heynen Rorstoken dochter, Gretken, ene mark geldes. Item Katherinen, Claweß Berndes dochter, ene mark geldes. Item nu myner maget Gheschen ene mark geldes. Item de frouwe, de in dem keller wonet under mynem huß, bege[re] ik, dar de tyd eres levendes umme godes willen to wonende. Item enen rinschen gulden den armen seken to sunte Jurgen. Item enen rinschen gulden tom groten hilligen geeste uppem achter huse. Unde begere van mynen erven, dat se teyn jar langk na mynem dode des jars twige een selebat to sunte Jurgen erbenomet den armen seken laten bereden.

Item alse Jochim van der Heide, myner suster Alken sons sone, Gerd genomet, mede een erve is lik myner andern suster dochter kindern, so gunne ik eme sinen andeel mynes gudes myt sodanem underschede nach synem regimente, dat he merkliken van den anvalliken erfgudern de he van mynes seligen vader suster kindern entfangen hefft unde untemeliken vorspildet unde vormynret heft. Umme em to besorgende in krankheit unde armode, de em in to komenden tiden vorwerket mochte werden, so schal he bruken de rente unde nicht des hovetstoles mechtich syn, to vorsettende ifte tovorpandende sunder myt medewetende unde vulborde myner vormunder unde negesten erven. Men ift he een erlike juncfrouwen ifte vrouwen int hillige echte tor ee nemande worde unde sik fromliken hadde unde telden tosammende kinder, so schal em unde sinen kindern sodane vorscrevene renthe unde hovetstoel to synem unde siner kinder nut unde beste volgende syn. Unde ifte he van dodes halve vorvelle unde nene frouwen int hillige echte genomen hadde, dar kinder van getelet levendich bleven, so schal sodane renthe unde hovetstol an myne rechte erven wedder komen.

Unde wil ok, dat desset myn testament ungebroken by vullermacht blive, so langhe ik dat witliken unde muntliken wedderrope. Unde dit testament mede to warende unde myne testamentariiese to wesen, kese ik de ersamen manne hern Everd vam Kroge, radman, Cord van Wintem, Hinrik van Nortem unde Jochim vam Kroge, borgere to Hamborgh, unde geve itliken twe rinsche gulden unde bevele ene, dar so by to donde, alse ik ene wol betruwe. Jodoch schal de erlike rad desser stad in dessem mynem testamente eres rechtes unvorsumet wesen. Hir an unde over synt gewesen de ersamen hern Johan Barschampe unde her Hinrik Moller, radmanne to Hamborgh, vam erliken rade hir sunderges togevoget, sik desses mede to vordencken.

To grotter tughnisse aller vorscreven stucke sint desser testamente twe enes ludes dat ene uth dem andern over dat wort warheit gesneden, der een by dem erliken rade unde dat ander by my syntt in bewaringe.

Geven na godes bord verteynhundert am twe unde negentigesten jar am Frigdage na divisionis apostolorum.

___________________________________________



erste Anlage 06.03.2004 Mathias Nagel / letzte Bearbeitung 04.01.2009 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen:
Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1492