1485.03.13.

In gades namen amen.

Ick Marqwart Holthusen, borger to Hamborch, nu tortiid na deme willen gades an myner suntheit gans swarliken gekrencket, jodoch van der gnade des almechtigen gades vulmechtich alle myner synne unde redelicheyt, byn entliken unde endrechtliken myt myner leven husfrouwen Beken avereengekamen unde hebben overgetrachtet, merckliken to herten genamen, dat wii so eyn yslick mynsche io sterven moth unde doch nicht enwethen wo edder wanner. Dar umme upp dat uns de doeth sunder schickinge unses testamentes unde latesten willen unvorsichtighen nicht vorsnelle, so hebbe wii tovorn van beyden parten vullenkamen willen myt vulborth unde conßenthe unser rechten erven, dede nu leven unde noch leven mogen de tiid unser beyder levende, gesettet unde gemaket unse testament unde latesten willen, setthen unde maken dat jegenwardigen in krafft unde macht dusser scriffte in nabescrevener wise.

Interste begeren wii, alse vrame kristen mynschen im hilligen cristenloven to stervende, unse armen sundighen sele in de barmherticheyt gades unde vordenst unde vorbiddinghe aller hilligen bevelende. So bekenne wii doch unde don apenbare witlick, dat wii eyn iewelk van synen erven erffgud entfangen hebben. Jodoch, so yd gentzliken, so baven screven, van beyden parten unser rechten erven vullenkamen beleveth unde bewillet ys, so geve wii unse natatene gudere eyn dem anderen na synem dode, dede lengest levet, dat de schal bestitten de guder des anderen, dewile eme god sparende ys synes levendes. Wanner wii denn beyde in god den heren vorstorven synth, so scholen denn unse rechten erven an beyden parten der nalatene guder allike na allike verne unvorsumeth wesen.

Baven dusse unser giffte so geve wii deme gemenen gude 8 lubesche schilling to wegen unde steghen unde willet, dat desset unse testament myt unsen erven bii vuller macht schal bliven unde geholden werden, so lange wii yd muntliken endrechtliken myt unsen erven samptliken wedder ropen.

Unde desset unse testament tovorstande unde unse testamentariese to wesende, kese unde sette wii de vorsichtigen ersamen Hans Nyebur, havemester to sunte Jurgen, unde Heine Hartman, borgers to Hamborch, samptliken unde eynem isliken besundergen vullenkamen macht gevende, desset unse testament also tovorstande unde tobestellende, als wii ene des wol getruwen. Tom latesten so schal de erlike rad to Hamborch in dussen vorbunden gifften erer stad rechtes unvorsumet wesen. Hiir an unde over hebben gewesen de ersamen heren(a) Johan Leseman unde Henninch Buringh, radtmanne to Hamborch, van deme erliken rade dar sulvest hiir sunderges togevoged, sick des tovordenckende. To groter tuchnisse aller vorscreven stucke synth desser testamente twe van worden to worden alens ludende dat ene uthe dem anderen vormyddelst den worden sanctus Jeorrius ghesneden, dat ene by deme rade unde dat ander bii unsen ergenen[ten] testamentarießen invorwaringhe.