1485.03.09.

1485 März 09. Hamburg.
Regest: Testament von Hans van dem Walle.
Überlieferung: StAHH, Classis X Vol.4 Series I 1485 III. 09.
Beschreibung: Kerbschnitturkunde auf Pergament. Vermerk von alter Hand auf Rückseite:
Hanses testament van dem Walle. A[nno] s[alutis] 1485. Edition: --.

In godes namen amen.

Ik Hans van dem Walle, borger to Hamborgh, begrepen mit lifliker krankheit doch van der gnade godes vulmechtich alle myner sinne, vornuft unde redelicheit, hebbe mit wolberaden mode, frigen willen unde vorsichtigen danken gesettet unde maket myn testament unde latesten willen in nabescrevener wise.

Interste alse ik na godes esschinge vorsterve, so bevele ik myne armen sundigen sele in de barmharticheit godes almechtich, siner werdigesten moder Marien unde aller hilligen unde begere, mynen licham cristliker wise tobegravende unde my erliken tobegande, unde neme dat uppe de stunde mynes dodes, dat ik nen erfgud entfangen hebbe. Men wes ik hebbe an guderen, hebbe ik mit myner eeliken husfrouwen to medegift genomen unde mit erer flitigen hulpe vorworven.

Dar van geve ik interste achte lubesche schillingh to wegen unde stegen. Unde alse ik gode entbarmet van gnadem anvalle unde gebrecklicheit wegen uthgeboden unde esschet bin, to sunte Jurgen vor Hamborgh to wonende, so geve ik myner eeliken husfrouwen Alleken umme mannichvoldige denste, gude unde woldat, my alrede bewiset, unde de se my ok vort bewisen mach, alle myne gudere, bewechlik unde umbewechlik, wor unde bii wem ik de nu rede hebbe unde my anvellik mogen werden, binnen unde buten Hamborgh, welkerleye namen, van watte staltenisse unde gewerde de sin, cleyne unde grot, nichtes buten bescheden. Dar van schal se mii de prove[ne] to sunte Jurgen betalen unde alle andere notroftige  unde behorlike dinge schicken unde uthreden unde my na erem vormoge trostlik unde behulplik wesen.

Wes se denne beholdet, wan se sodanes uthredet heft, des schal se rouweliken bruken, geneten unde dat keren unde geven, wor ere gelevet, sunder myner erven unde enes isliken, he zii geistlik ifte werlik, vorhinderinge, insage unde wedderstal. Doch so schal de ersame rad to Hamborgh in dessem testamente eres rechtes unvorsumet wesen.

Wil ok, dat id stede, vast unde unvorbroken geholden werde. Unde dat towarende unde myne testamentariese to wesende, kese ik de erbarn unde vorsichtigen manne hern Johanne Starken, vicariese, unde Ludeken Camerman, borger to Hamborgh, se frundliken biddende, desset antonemende unde tofordernde, so ik en wol betruwe. Hir an unde over hebben gewesen de eraftigen heren her Hinrik van Dulmen unde her Jurgen Lam, radmanne to Hamborgh, van dem erliken rade darsulves hir sunderges togevoget, sik des tovordenkende. To orkunde unde merer tughnisse aller vorscreven stucke sint desser testamente twe enes ludes dat ene uth dem anderen gesneden over dat word Jhesus, der eyn bii dem rade unde dat ander bii myner ergemelten eeliken husfrouwen sin in vorwaringe.

Gescreven na godes bord verteynhundert am viiffundeachtentigesten jare am negesten Midweken vor sunte Gregoriuß dage, des werden paweses.

___________________________________________



erste Anlage 07.03.2004 Mathias Nagel / letzte Bearbeitung 04.01.2009 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen:
Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1485