1485.02.13.

1485 Februar 13. Hamburg.
Regest: Testament von Tideke Moller.
Überlieferung: StAHH, Classis X Vol.4 Series I 1485 II. 13.
Beschreibung: Kerbschnitturkunde auf Pergament. Vermerk von alter Hand auf Rückseite:
Tideken Mollers testament sowie die Jahreszahl 1485 von späterer Hand. Edition: --.

In godes namen amen.

Ik Tideke Moller, borger to Hamborgh, begrepen mit lifliker kranckheit doch van der gnade godes vulmechtich alle myner sinne, vornuft unde redelicheit, hebbe angezen unde woltbetrachtet unwillen, vordreth unde werre, de vaken unde to velen tiden upstan unde vorrisen na dode der jennen, de sunder testament unde bestellinge eres lesten willen vorscheden. Hirumme, sodaner twedracht unde mishegelicheit vortokomende, so hebbe ik gesettet unde maket myn testament unde latesten willen in nabescrevener wise.

Interste alse ik na godes esschinge vorsterve, so bevele ik myne armen sundigen sele in de barmharticheit godes almechtich, dem vordenste sines bitteren lidendes, der vorbiddinge siner hochgebenedieden moder Marien unde aller hilligen unde begere, mynen licham cristliker wise to begravende unde my erliken to begande, unde geve van mynen wolgewunnen unde nagelaten gudern interste achte schillingh to wegen unde stegen.

Vort so geve ik sunte Nicolai kerken binnen Hamborgh mynen besten rock, unde mynen negesten erven, alse mynem broder Godeken Moller unde myner suster Gheseken, geve ik samptliken myne andern cleder, alse hoyken, rocke, wamboyse unde hasen, so ik de gedragen unde to mynem live gebruket hebbe. Dar mede scholen se genßliken van myner eeliken husfrouwen Greteken gedelet unde scheden wesen unde scholen se dar enboven nicht moygen edder anlangen.

Alle myne andern gudere, alse ingedome, husgerade, beddewand, clenade unde ander rasschup, welkerleye unde van watte namen de sin, grot unde cleyne, nichtes buten bescheden, de geve ik myner ergenanten eeliken husfrouwen Greteken umme mannichvoldige denste willen unde gude my in myner krancheit to langen tiden bewiset, de se rouweliken beholden unde bruken schal na erem willen sunder myner erven unde enes isliken, he zii geistlik ifte werlik, inseggend unde hinder. Jodoch so schal de eraftige rad to Hamborgh in dessen giften eres rechtes unvorsumet wesen.

Wil ok, dat desset myn testament bii macht blive unde unvorbroken geholden werde, idenzii ik dat mundliken wedderrope. Unde dat towarende unde mynen lesten willen tovorvullende, kese ik de erliken unde vorsichtigen manne hern Diderike Moller, vicariese in sunte Peters kerken, unde Hanß Harteken, borgher to Hamborgh, se frundliken biddende, desset antonemende unde toschickende, so ik en wol betruwe.

Hir an unde over hebben gewesen de erbarn heren, her Henrick van Dulmen unde her Everd vam Kroge, radmanne to Hamborgh van dem ersamen rade darsulves hir sunderges togevoget. To orkunde unde tughnisse aller vorscreven stucke sint desser testamente twe enes ludes dat ene uth dem andern gesneden over dat word  Jhesus, der eyn by dem rade unde dat ander by myner eeliken husfrouwen erbenomet sin in vorwaringe.

Gescreven na godes bord verteynhundert dar na in dem viiffundeachtentigesten jare am avende sunte Valentini des hilligen mertelers.

___________________________________________



erste Anlage 07.03.2004 Mathias Nagel / letzte Bearbeitung 04.01.2009 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen:
Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1485