1484.10.02.

In godes namen amen.

Ik Wibeke, seligen Tideken Holthusen nalatene wedewe, borghersche tho Hamborgh, hebbe avergetrachted de gebrekelicheit der mynschliken nature, so dat ik alse alle mynschen des naturliken dodes yo sterven mot und doch nicht en wet de stunde edder tyd des dodes. Hir umme dat my de dod nicht unvorsichtliken avervalle, so sette ik mit willen unde vulbord myner rechten erven, alse Hinrik Sennip, mynes sones, unde Hermen Monnik unde Otte Hugen, mynere dochtere manne, myn testement unde lesten willen in desser nascreven wise.

Interste beghere ik unde wil, dat sodane testemente in vorgangen tiden gemaket van seligen Aleken Brusz, wandages borgherschen to Hamborgh, dat nu an my gekomen ys, blyven in aller wise und also geholden werde, alse it ludet unde gemaket ys.

Vortmer gheve ik van mynen tydliken guderen interste achte schillinghe penninge to wegen unde stegen. Item gheve ik vif mark iarlike renthe van den neghen mark geldes, de ik hebbe in deme erve Hans Borckwedels, belegen uppe der Nigenborgh twischen Gheteken Moller uppe de enen unde Hans Meynsen uppe de anderen siden. De schalme gheven to der ere godes umme myner unde myner olderen unde vrunde sele salicheit alle iare ener armen iuncfrouwen, de uth myneme slechte geboren is, to beradende. Unde were dar nement in myneme slechte, de des behof hedde, so schalme se ener anderen armen iuncfrouwen gheven.

Jodoch scholen myne testementarii alle iare hebben achte schillinge penninge van dessen vif marken to den achte schillingen, de se ok hebben schullen van achte mark gheldes uth Alleken Brus testemente to erer maltyd. Unde desse rente van beiden testementen schal me gheven alle iare unde nicht upleggen van iaren to iaren. Unde dat scholen se don eyndrechtliken tosamende.

Unde desse beyde testemente to vorstande unde mynen lesten willen darynne vultobringende, kese unde sette ik de ersamen manne Hinrik Sennip, Hermen Monink, Otto Hugen unde Hinrick Bolcken, borghere to Hamborgh, unde beghere, dat se dat willen annemen, wan de tyd kumpt, unde dat also vorstan, alse ik ene wol to truwe unde se vor gode willen bekand wesen. Unde wente dat van dessen Testementarien welk vorstorven, so scholen de anderen vullenkomen macht hebben, enen anderen erliken man in de stede [des doden] to kesende.

Ok wil ik, dat ditsulve myn testement by vuller macht blive so lange, dat ik dat muntliken wedderrope. Unde in desseme testemente schal de ersame rad to Hamborgh erer stad rechte unvorsumed wesen. Hyr sint mede an under aver wesen de ersamen her Hermen Bekendorp unde her Johan Lesemann, radmanne to Hamborgh van deme rade sunderges hyrto gevoget, sik to vordengkende. To merer warheit sint desser testemente twe allens ludende dat ene uth deme anderen sneden aver dat word salus, der dat ene is by deme rade unde dat ander by my unde mynen testementarien in vorwaringe.