1477.03.21.

Denn ersamen wisen heren borgermeistern unnd radtmannen der stad Lubeke, unnsen bisunderen guden frunden.

Unnsen frundliken grut mit vermoge alles guden tovorne.

Ersame wise heren, besunderen guden frunde. So juwe leve uns nu unlantges by unsen radessendeboden ene copie, in maten de erbaren unse frunde de olderlude in Vlanderen an juw des bestandes halven mit den Hollanderen ete. gescreven hebben, benalet unnde juve beweginge dar by hebben laten weten, so dath juw nicht nutte duchte gedan sin, dat bestand to eneme jare allene antonemende, umme sahe willen den unsen alles vormeldet, men juwe guddungket were, dat men dat to ener horten tiid anneme, eere se enen mechtigeren heren wedderkregen, uppe dat men veler gebreke, de den gemenen copmann von der hanse van den Hollanderen unnd eren medebewandten jegen privilegie unnd recesse sint weddervaren unnd men siik noch forder to bescheende moth befruchten, wandel unnd beteringe mochte weddervaren, welk men nu vor der tiid, eer se enen heren wedder krigen, wol beth wen na kan bedegedingen etc., unnd wann sulker gebrehe wandel gescheen mochte byrnnen der horten tiid desses bestandes, denne dathsulve bestand to vorlengende to ener sekeren tiid von velen jaren etc.

Ersamen leven henen, sodane juwe beweginge wii wol ingenomen hebben unnd sint der tovreden, so verne men sulke sake in so horter tiid konde to reden unnd wergke stellen; dartho gii wol willen gedengken mit deme besten, unnd wes gii deshalven den olderluden bevelen unnd schriven, setten wii by juw unnd sint des tovreden.

In besunderheyd duchte uns nutte unnd geraden wesen, dat juwe leve den olderluden mede schriven, dat de artikele an der lesten dachvard to Utrecht, dar unsere borgermeister her Hinrik unnd juwe secretarius Johannes Bersembrugge an unnd aver weren, werden vorgenomen unnd gewandelt, so dat de gemene copmann daran werde besorget, ok in bisunderen desulven olderlude mede willen in ansprake unnd worden holden von der pene, dar in de Hollandesche stede unser stad sint vorfalle, so dat ok up den dachfarden to Utrecht is geandet.

Ersamen leven heren, des besten hiir an to ramende, so gii gerne don, daran ii nicht antwivelen; des sint wii wol tovreden unnd vorschuldent umme juwe leve, de wii Gade selichliken bevelen, allewege gerne.

Screven unnder unnser stad secrete ame Fridage na Letare anno etc. 77.