1447.07.23.
Des sondaghes vor Jachoppy was beredet en dach an den 47. jahre tweschen Lubben Oneken unde Tannen uppe ene syde, Eden Boghens unde Syrke uppe ander syde, na enen recesses unde Vorwort, dat tosamt her Olryk to Watwerden, Tanne Kanken, Alleke Iken Onneken sone, unde Hinrykes Scryver to Ghever, dat dar utsproken wart, dat alle seghel unde breve, recesses unde alle schedinghe, de me bewisen mochte, schal stan an vuller macht, Unde wes beyden parden dar boven scheide uppe mallikanderen to sprekene, setten se by den ersamen rat to Honborch ut to seggende to vrenschup ofte to rechte.
Also deden de ersame rat von Honborch sennen boden an den kloster to Esense, dar an unde over was de ersamen heren, her Direk Baller, provest to senten Steffen, her(1) provest to Emeden, juncher Olryk, hofling to Esense etc., her Olryk to Wadwerden, Direk Bardewis, Wilken Frese, drosten to Oldenborch etc. Hinrek Cluke, des rades sendebode to Bremen, Tanne Kanken, Maryses(2) Kanke unde Knop(3) to Oldenborch unde vele vromer lüde:
an dat erste, dat de kerken, de se beset haden, schullen se rumen, unde godeshus bliven, unde de husyn(4) schal synes erves unde gudes bruken, unde der wedder ingan, unde en nenen overval do, men eren rechten broke. Unde Tanne unde Lubben schulden sytten an aller rechtegheyt unde herlicheyt.
Daruppe hebbet se vrede boden to beyden syden des achten daghes na Pingsten by ener pene dusent Rynscher gulden, dat se belevet unde willekort hebbet. Under deser tyt wil de ersame rat den utspreke don na klaghe antworde, to vrenschup ofte to rechte myt worden ofte an scryft, dar ere brefe uppe maket syn beseghelt.
Ok segheden den ersamme ratessennboden, dat here(5) schal wedder uppe de borch(6) an syn hus unde schal overgheven de kerken unde bruken des stenhuses half, unde den slotel darmede to hebben, unde synes erves bruken, so he van der borch gynge, unde en den anderen nenen averval don.
Ok segheden my to her Johan Gerwien unde her Wilmen Brant, dat de rat van Honborch boven seghel unde breve unde schedinge nycht dar mer up scheden willen, anders wolde Lubbe unde Tanne myt eren vrenden weg reden hebben uppe den dingsedaghen avent van Esermonken, do se my boden senden by Tannen Kanken.
___________________________________________
2 Mauritius.
3 Dirik Knop, Bürgermeister zu Oldenburg.
4 husing, d.h. Hausmann.
5 Inhausen.
6Tantsen.
erste Anlage 19.8.2017 Jürgen Sarnowsky / letzte Bearbeitung 19.8.2017 Jürgen Sarnowsky /
Bearbeitungsstand: Druck, nicht mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1447