1447.04.01.

Alle den ghennen de dessen bref zeen, horen edder lesen, do wij Johannes deken vnde gantze Capittel vnsser leuen vrouwen kerken binnen Hamborch Bremisches stichtes witlick apenbare betughende mit desseme breue, dat de Ersamen borghermestere vnde radmanne darsulues to / Hamborch vor vns hebben ghehat enen apenen beseghelden bref van parmynte mit eneme runden angheganghen ingheseghel ghe-/[uestig]et, ghedrucket in gheel was, vnde hanghede an ener pressulen van parmynte, an welkeme ingheseghele was vthghedrucket eyn [bilde] enes ridende mannes vp enem perde mit ener schickinghe enes helmes vp sineme houede vnde enes hanghenden schildes vor siner borst, daran was vtghedrucket eyn drehornet nettelenblad, van dem Eddelen junchern Otten wandaghes greuen to Holsten vnde Schouwenborch, deme Ghod gnedich sij, vthghegheuen, welke bref ludet van worden to worden alduß:

Wy juncher Otte von Godes gnaden greue to Holtzteen vnde Schowenborgh,
bekennet vnde betughet vor allen luden apenbare in desseme breue, dat wy vnsse leuen mannen de nu in deme Ossenwerder wonaftich sin vnde noch wonaftich moghen werden, hebbet gheorlouet vnde de gnade geheuen, dat se schon den Morwerder, de beleghen is bij deme Ossenwerder, dijken, vnade darto den Jnwerder, de bij deme Tatenberghe is gheleghen, vnde schon dar aller rechticheit inne bruken de se in deme Ossenwerdere van vns hebbet, mit deme hoghesten rechte vnd mit deme sidesten in aller wis alse de bref vtwiset de in van vnssen vorolderen vp den Ossenwerer ist besighelt. Men se en schon dar nyne hus buwen.

Desse werdere schon [se like] delen na morghentale des Ossenwerders, iewelkem sin deel, vnde desse dre werdere dat schal eyn ghud wesen vnde sametghud bliuen.

Ok so en schal vnsser vorscreuen lude nyn desses vorscreuen ghudes en ane dat andere noch vorsetten noch vorkopen.

Ok en schon se id nenen papen vorgheuen, vorsetten noch vorkopen wat ghudes vns ok vorspadet worde in deme Ossenwerdere des ghelijk scholde [vns ock] vorspaden in deme Morwerdere vnd in deme Jnwerdere.

Ok so schon se vnde wilt den Ossenwerder [so vorwaren], dat de nicht ingha. [Leten se] den auer vor [ghan], des Ghod nicht en wille, so scholden beyde de Morwerder vnde de Jnwerder vnsse leddich vnde loes wesen ane alle bisprake vnde hinder mit aller slachten nut.

Vortmer so schon vns vnsse vorscreuen lude van eneme iewelken morghen in deme Morwerdere vnde Jnwerdere iewelkes iares enen schillingh to schatte gheuen, vnd van eneme iewelken morghen, de darsulues beseyt werd, iedes iares, to tegheden enen schilling bauen den vorscreuen schat.

Vortmer alle rechticheit de wij in deme Ossenwerdere hebbet, de schon wij vnde wilt bauen dessen schat vnde tegheden in dem Morwerdere vnde Jnwerdere vns vnde vnsser herscop [beholden] vnde hebben Alle desse vorscreuen stucke schon wij Juncher Otto vorbenompt vnde vnsse nakomelinghe vnde wilt se vnssen leuen mannen vorscreuen vnde se [vns] stede vnde vast holden in alle wis vnuorbraken.

Vnde vp dat dit ewich vnde vast bliue, so hebbe wij in dessen bref ghegheuen, mit vnssem ingheseghel vor vns vnde vnsse nakomelinghe witliken beseghelt.

Hyr an vnde [auer hebben] ghewesen Jordan van Helb[eke], Hinrich [van Helbeke], Hermen van Nendorp, Gherd vam Haghen, vnde ander gude lude ghe[noch].

Dit is scheen na Godes bord drut [teyn]hundert iar in deme ersten iare bauen souentich, des achten daghes der hilghen dre koninghe.

Alse wij Johannes deken vnde dat gantze capittel vorscreuen dessen bref vnde ingheseghel alle vlitighen angheseen hadden, [leten] vns de vorscreuen borghermestere vnde radmanne witlick doen, wo dat se dessuluen breues in gherichte vnde buten in anderen steden behoueden, dar se doch den houetbreff vmme vare vnde anders sunderghes anvalles willen nicht hebben konden, begherende, dat wij on des en bewisinghe vnde tuchnisse, dat wij sodanen bref vnde ingheseghel alghants vntobroken vngheserighet vnde sunder alle vordechtnisse rechtuerdich gheseen vnde bevunden hebben. Wan denne wij Johannes deken vnde capittel vorscreuen hebben auerdachte sodane der vorscreuen borghermestere vnde radmanne [bede] rechtuerdich vnde der redelicheyt lik to wesende, darvmme hebbe wij den erghenanten borghermesteren vnde radmannen dessen bref ghegheuen [ere recht mede] to bewisende, wor vnde wanner one dat noet vnde behoeff werd, vnde hebben darvp to merer witlicheid [vnde vorderer tuchnisse vnsser kerken insgheseghel witliken hanghen laten an dessen breff,