1353.08.25.

1353 August 25. Winsen.
Regest:Herzog Wilhelm von Braunschweig und Lüneburg unterrichtet Papst Innozenz VI. darüber, dass entgegen den Behauptungen, die das Hamburger Domkapitel im päpstlichen Konsistorium vorgebracht haben soll, die Ratsherren und Bürger Hamburgs allgemein als ehrbare Bürger, gesetzestreue Kaufleute und rechtgläubige Christen angesehen würden und dass ein zwischen den Streitenden geschlossener Vergleich öffentlich bekannt sei.
Überlieferung: StAHH, A = Threse Xx 27; hier nach B, C = Copie archivi zu 1353 August 25.
Beschreibung: B ist Abschrift aus dem 19. Jahrhundert, C ist maschinelle Abschrift, jeweils mit dem Vermerk der Thresennummer; A Pergament, ohne Spuren eines Siegels. Vermutlich ist das Schreiben auf Seiten des Hamburger Rates ausgefertigt, dem Herzog aber nie zur Besiegelung vorgelegt worden.
Edition: --.

Sanctissimo in Christo patri ac domino domino Innocentio sacrosancte Romane ac universalis ecclesie summo pontifici Wilhelmus Dei gratia dux in Brunswic et Luneborch cum humili subiectione devota pedum oscula beatorum.

Sanctitati vestre humiliter significamus, quod consules civitatis Hamburgensis Bremensis diocesis nobis significaverunt dolenter(a) gravibus cum querelis, quod canonici dicte civitatis Hamburgensis in consistorio sanctitatis vestre graves articulos et crimina enormia heresim et fidem catholicam tangentes publice contra ipsos proponi fecerunt, prout hoc ad nos et ipsos ex fama et relatu veredicorum virorum de novo pervenit et ut dicti canonici coram pluribus confessi sunt, ut dicitur.

Et quia a dictis consulibus Hamburgensibus dicti canonici requisiti in civitate Lubicensi, ubi moram trahunt, ut ipsis copiam dictorum articulorum et citationis, quam se habere asserverunt, traderent, et cum dictis consulibus nulla copia fuerit data, quia(b) nullam citationem habere se dixerunt, prout hec ad nos devenerunt veredico(c) ex relatu, sanctitati vestre insinuamus, quod dicti consules et eorum cives et universitas, licet in curia sanctitatis vestre super diversis articulis libertatem eorum concernentibus cum dictis canonicis litigaverint, tamen sunt probi et honesti viri, bone fame, legales mercatores, fideles et veri Christiani et sic in domino nostro et in toto regno Alamanie communiter reputantur.

Insuper sanctitati vestre significamus, quod de quadam compositione, quam legi audivimus, ordinata inter ipsos est publica vox et fama. In cuius rei testimonium sigillum nostrum a tergo presentibus est impressum.

Datum in castro nostro Winzen, anno domini millesimo CCC° quinquagesimo tertio, in crastino beati Bartholomei apostoli. Dominus omnipotens sanctitatem vestram sanam et incolumem conservet per tempora longiora ecclesie sue sancte.

___________________________________________

(a) B dolentes.
(b) B quod.
(c) B veridico.

erste Anlage 03.10.2004 Jeanine Marquard / letzte Bearbeitung 04.01.2009 Jürgen Sarnowsky /
Bearbeitungsstand: erste Transkription, nicht mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1353