1353.06.19.

In nomine domini, amen.

Uniuersis Cristi fidelibus presentes litteras inspecturis seu audituris Johannes de Campe, prepositus ecclesie Hamburgensis, Bremensis dyocesis, ac Zwerinensis ecclesie canonicus, salutem in domino.

Johannes predictus, compos mentis et corporis, rerum mearum disposicionem per presens nuncupatiuum testamentum seu ordinacionem mee vltime voluntatis disposui in hunc modum.

Item rogo et volo, ut duarum marcarum redditus vsualis monete Zwerini comparentur, distribuendi in anniuersario obitus mei inter canonicos et vicarios ecclesie Zwerinensis presentes in vigiliis et in missa pro defunctis, sic quod canonici duplum et vicarii simplum recipiant. Et unius marce usualis redditus et plus, de mea pecunia comparatos, ad lampades deputaui, que - in clippeo ferreo super ambonem predicte ecclesie Zwerinensis collocande, et ad lampadem ante eucharistiam in eadem ecclesia incessanter ardentem.

Rogo et desidero affectanter, ut predicte lampades accendantur et ardeant in primis et secundis vesperis, in matutinis et officio misse, videlicet in quatuor diebus festiuis natiuitatis Cristi, in Circumcisione Domini, in quatuor diebus festivis Penthecostes, in festo Corporis Cristi, in dedicacione ecclesie, in festo sancti Johannis Baptiste, beatorum Petri et Pauli apostolorum festis et in cuiuslibet apostoli festo, in beate Marie Magdalene et sancti Laurentii festis, in Assumpcione et Natiuitate sancte Marie, in sancti Michaelis, beati Luce Ewangeliste, Omnium Sanctorum, sancti Martini et beate Elizabeth, sancte Katherine, sancti Nicolai festis, in Concepcione beate Marie, necnon in festis beatorum quatuor doctorum, videlicet Gregorii, Ambrosii, Jeronimi et Augustini.

Item lego et relinquo ecclesie Gustrowensi viginti marcas Lubecensis monete, soluendas per dominum Luderum de Campe, auunculum meum, canonicum Gustrowensis ecclesie, in quibus michi tenetur, ad comparandum redditus distribuendos canonicis et vicariis dicte Gustrowensis ecclesie in anniuersario meo presentibus in vigiliis et in missa pro defunctis.

Item lego et relinquo dicto domino Ludero, avunculo meo, duo vasa argentea dicta schale, cum punctis et rosis formata ad modum operis Parisiensis, et omelias beati Gregorii pape.

Item volo et ordino, vt, si Lubece debitum carnis persoluero, corpus meum statim Reynebeke deducatur et ibidem exequie mee peragantur; quibus peractis corpus meum in capella Hamborch per me constructa sepulture tradatur.

Ad hec omnia et singula expedienda et complenda esse volo, dispono et eligo commissarios meos et huius testamenti seu vltime voluntatis mee executores honorabiles viros dominos Luderum de Campe, auunculum meum predictum, Wernerum decanum, Hinricum Witten, Hermannum Helt, Johannem Greseken, canonicos, Sifridum Latecop et Conradum Bishorst, perpetuos vicarios dicte Hamburgensis ecclesie, necnon honestum virum Hermannum de Wickede, consulem Lubicensem.

Et nos Wernerus decanus et capitulum Hamburgensis ecclesie sub appensione sigilli ecclesie nostre ad causas recognoscimus, quod omnibus et singulis supradictis deliberate nostrum placitum adhibemus pariter et consensum.

Acta sunt hec Lubece in ecclesia beati Egidii confessoris, anno domini M°CCC°LIII°, decimo nono die mensis Junii.