PrUB, JS-JP 49

{Überlieferung}
A = Publ. Record Office London, Parliam. Petitions 11 Rich. II.

{Drucklegungen}
Aus A Hansisches Urkundenbuch, Bd. 4 (1361-1392), bearb. v. Karl Kunze, Halle a. S. 1896, Nr. 910, S. 386;
Rotuli Parliamentorum, ut et peticiones et placita in parliamento, 6 Bde., o.O. o.J. [London 1778-1783], Bd. 3, S. 253b, Nr. 4.

{Diplomatische Erörterung des Stücks}
Parlamentsakten.

As treshonourez seignours du parlement monstrent et compleignont les merchantz del Hanse dAlmaigne, qe sont acustumez de venir ovesqe lour merchandises en Engleterre, qe, come les nobles progenitours nostre seignour le roy^a), queles Dieux assoille, ount grauntee par chartre as ditz merchantz plusours graciouses franchises, quelles en lour temps furont bien tenuz et meyntenuz, laquelle chartre il ad plu a nostre tresredoutee seignour le roy, qore est, de sa benigne grace ratifier et confermer, et nounobstant cela les ditz merchantz sont compelles et constreyntz de payer quinszeins, dismes et plusours autres subsidies, et outre ceo ils sont destourbez de plusours autres articles de lour dite fraunchise encontre la fourme de les graunte et confirmacion suisditz, en graunt enpoverisement de lour estat; et auxi, treshonourez seignours, touz les ditz merchantz ovesqe le[s] biens et merchandizes parmy la roialme sont arestuz et furont grevousement mys en prison et la tenuz par longe temps et unqore demuront en arest, et auxi lour debtes a eux duez et ensement lour biens et merchandises, qe venent hors de lour pays deyns le dit royalme, sont de jour en autre arestuz, par cause qe home lour surmette, qe les seignours de Pruys ount arestuz illoeqes les biens des merchantz Engleys; dount les ditz merchantz del Hanse sont innocentz et de rien coupables, si come ils purront bien prover:

qe plese a voz graciouses seignouries pur lamour de Dieux ordeigner, qe les avauntditz merchantz ovesqe lour biens et merchandises purront estre disarestuz et diliverez, et outre ceo veir et entendre lour dite chartre et les articles et libertees en ycelle comprisez, et qils purront avoir et enjoier lour ditz fraunchises, en manere come lour predecessours ount hieuz devant ces heures et enjoyes, ou autrement qils puissent avoir lour biens et les debtes, qe lour sont duez, pur passer hors del royalme soutz salve proteccion et conduyt du roy, come ils venoyent deyns le royalme, eyant regard, si plesir vous soyt, qe les ditz merchantz ount dispenduz graundement entour la suite de lour fraunchises et rien ne lour vaille.

^a) nre s r s les roys der Abdruck.

¹⁾ Der Einlieferungstermin für Petitionen an das Parlament; die Session dauerte bis Juni 4; vgl. Rotuli Parliamentorum, Bd. 3, 228 und 252.