PrUB, JS-JL 20

{Überlieferung}
B = OF [olim Staatsarchiv Königsberg, Hochmeister-Registrant I.a, p. 49.]

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 5, 1857, ND Osnabrück 1965, S. 51-52.

{Regest}
RBDO I, OF 2a, 24.

{Diplomatische Erörterung des Stücks}
Register-Überlieferung, Abschrift.

Unsern willigen dinst etc. Irluchter fürste grosmechtiger lieber herre.
Also alz der groskompthur, der obirste marschalk und der kompthur czum Elbinge mit euch han geredt von der gefangen wegen, so wisset das sy itczunt czu Slochow sint uff dem wege, das man sy noch euwer beger gestellen sal czu Falkenburg uff den tag, alz euwer grosmechtikeit wol wissentlichen ist. Und wir haben mit in pferde usgerichtet, di unser dyner und ire gerethe her abe von Falkenburg sullen brengen. Weres nu, das euwer grosmechtikeit dirkente, das ir des gefengnis nicht ledig und los muchtet werden, so bitte wir euch mit allem flieze, das ir uns das geruchet weder under oygen {S. 52} schriben, uff das wir mit den gefangen die grose ko^este und mue nicht umb sust du^erffen tragen, die wir mit den lu^eten thun mu^esen, die die gefangen ken Falkenburg geleiten und die grose var steen, sy wedir her abe in den jsen czu fu^eren.
Want itczunt boten synt gesant, als wir gewarnet syn czu iren frunden von den, die czu Marienburg legen, das man die gefangen ken Falkenburg fu^ere. Also das wir uns gro^eslich besorgen, weres, das sie ken Falkenburg wurden gebracht und euwer grosmechtikeit des gefengnis nicht ledig und los würde, wenn man sy denne wedir her abe sulde fu^eren, in den ysen gesmyt, das lichte eyn ungeschicht von iren frunden czu in geschege, also das die unsern wu^erden nyder geworffen, gesmeet und gelestert, und die gefangen genomen. Des bitten wir euwer grosmechtikeit mit flieziger begerunge, das ir das geruchet mit uns besorgen, uff das wir keynen schaden an den unsern, und ouch an den gefangen von des wegen entpfan, und die grose koste und mue nicht du^erffen umb sust thun.
{Datierung} Gegeben czur Sweecze am tage sancti Sixti pape et confessoris¹⁾.
 

¹⁾ [1389] August 6.