PrUB, JS-JL 18

{Überlieferung}
B = OF 2a, 14-15 [olim Staatsarchiv Königberg, Hochmeister-Registr. Nr. 1, p. 54.]

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 5, 1857, ND Osnabrück 1965, S. 49-50.

{Regest}
RBDO I, OF 2a, 43.

{Diplomatische Erörterung des Stücks}
Register-Überlieferung, Abschrift.

Allirdurchluchste furstynne gnedige frowe. Uwir grosmechtige durchluchtigkeit begere wir zcu wissen, das unser herre der romische kuning uns in sinen brifen hat geschriben, und ouch als der groskumptur unsirs ordins, den wir in unsir und unsirs ordens botschafft zcu dem egeschriben unserm herren, dem rom[ischen] kuning hatten gesandt, volkomelich hat vornomen von dem edelen strengen ritter hern Otten Pflug, der nuwlich by uwir grosmechtikeit ist gewest, und von uch vorstanden und vornomen hat, wy das wir uwern widersachin by sten und beholfen weldin syn in allen stucken wider uch und uwir riche. So thun wir uwir kuniglicher herlichkeit zcu wissen, das ein sulches in unsern willen noch in unsern mut ny qwam und wir noch rat noch tat in keynirlei wis noch heimlich noch offinbar do von mit ymande ny habin gehabt.
Hirumb, allirduchluchste furstynne, grosmechtige frowe, bitte wir uwir durchlucht[ikeit] mit ernster begerunge, das ir sulcher rede, dy uwer grosm[echtikeit] uff uns und uff unsern orden in dem gesaget und vorbracht, geruchet nicht gelowben, und alle dy jene, dy sulche rede uwir herlichkeit vorbrengen, der warheit sere irre geen, wand wir mit uch und uwirn riche nicht andirs wissen, und vor ouch nicht andirs habin gewust, dan lybe, gut und alle fruntschafft. Und ouch, der allirduchluchtste furste, uwir vater seligs gedechtnis, do her us synem riche vortrebin wart, in guter zcuvorsicht by uns in unsern landen zcu Prussin was, und syn gelt do selbest in unserm lande gutlich und fruntlich vorczerte, und by uns synis lybes sichirer was dan by andern, worumb soldt wir denne ein sulchs, als vorstet geschriben, wider ewir grosm[echtikeit] thun. Und weres, das ymand uwir herlichkeit andirs welde sagen und vorbrengen, wan das sich czo^ege zcu mynne und zcu fruntschaft, so geruchet des nicht gelowben, und laset uns das in uwirn briven vorsten, das wir uns eines ken uwir grosm[echtikeit] mogen vorantwurten.
Ouch thun wir uwir herlichkeit zcu wissen, das wir undirrichtet syn von unserm schaffer, bruder unsers ordens, wy das uwir undirsossen eyner geheisen Henneg Lembek unsers ordens schaffern und etlichin unsirn armen luten von Prussen ir gut mi gewalt wider alle recht genomen hat und is uwir grosm[echtikeit] sye geantwurt, als wir das selbe uch etwy dikke ouch vor eigentlicher han geschriben. Worumb bitte wir uwir grosm[echtikeit] mit flise, das ir geruchet uns und den unsern dorczu beholfen syn, das uns und den unsern mit uwir holffe moge {S. 50} ir gut wider werdin, das wir alle wege in eym sulchin wellin wider ken den uwern vorschulden, wo sich das gebort.
{Datierung} Geben zcum Brathian am Dornstag noch Mathei²⁾.

¹⁾ Margarete I. - Regentin bzw. Königin von Dänemark (1387-1412), Königin von Norwegen (1388-1412), Königin von Schweden (1389-1412); 20.7.1353-28.10.1412.
²⁾ 1389 September 22 (oder 1390 September 22).