PrUB, JS-FS 69

Unsern fruntlichen grus etc. Erbarn lieben besundern frunde.
Uwern brif uns nuwelich gesant by uwerm boten, haben wir wol vornomen und liblich enphangen. In dem wir geschreben vinden, wi das der koning von Polan mit sinen steten und mit den herczogen von Stettin, vom Sunde mit iren steten obereinkomen sien und haben gemacht nuwe strasen von Polan und durch Polan, bis ken Stettin. Und ouch wi das si meinen czu wasser di Warte uf und nedir czu farn vor Landisberg und di wagenfart vor Drisen uf und nedir und wo si mogen. Das doch von alders nie gewest ist bisher und wi das diselben strasen des irluchten forsten, unsers herren marggrafe Jost und ouch unsern landen grosen schaden brengen und tun das wol czu merken ist. Do antworte wir also uff, frunde allerlibsten, wisset, das wir uwern boten bisher mit der antwort vorczogen haben durch des wille, das wir luete vorbott haben, den is kundig ist und mit den dovon gesprochen, also das wir underrichtt sien, das die vorgenanten strasen beide czu wasser und czu lande wol uf 12 ader uf 10 milen von Schifelbein geen, also das si unser land nirne ruren nach dorine geen.
Und dorumb so hab wir is swer czu weren, ouch sint wir wol underrichtt, das die selben strasen geen musen mitten durch unsers gnedigen herren herczo[gen] Johan land von Gorlicz, durch die Niuwe Marke. Sundirlich czu schiffen di Warte nedir bis in di Oder und vort  di Oder nedir bis czu Kostrin durch di brucke, dannen vort bis czu Odersberg ouch durch di brucke. Also das wir merken , das si unser herre herczog vorgenant und di sienen wol weren mogen ab sie wellen.
Hirumb frunde allerlibsten so tun wir uwer erbarkeit czu wissen, das wir uch czu deser czit nicht wissen  anders doruff czu schriben noch czu antworten, wan uns di sachen fremde sien und di land unkundig, is were denne das ir ader imands anders uns der sachen anders underrichten welde ader underrichtte und were das wirs anders underrichtt worden, also das wir mit eren adir mit rechte icht dorczu getun mochten, an vordechtniss unsers herren, des  herczogen von Gorlicz und der sienen. Und wenne uns das czu wissen worde und wir des underricht worden, dornoch welde wir gerne doruff gedenken und uwer liebe ein antworte schriben, was der orden dorczu getun mochte ader nicht. Domitt gebitt czu uns solle wir icht tun uch czu liebe und fruntschaft, das welle wir gerne tu ^en.
Gegeben czur Mewe am Sonabunde vor Lucie. ¹⁾