PrUB, JS-FS 37

1386 Mai 2. Marienburg.

{Regest}
Hochmeister Konrad Zöllner von Rotenstein verkündet eine mit den Bischöfen von Preußen und den Äbten von Peplin und Oliva entworfene Landesordnung über Rentenkauf.

{Überlieferung}
B = Pergament-Urkunden, Schieblade VII, 1.

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 4, 1853, ND Osnabrück 1965, S. 48-49; Akten der Ständetage Preussens unter der Herrschaft des Deutschen Ordens, hrsg. v. M. Toeppen, Bd. 1, Leipzig 1878, ND Aalen 1973, Nr. 26, S. 44-45 [beide Ausgaben sind verglichen].

{Regest}
JH II 1131.

{Diplomatische Erörterung des Stücks}
Gleichzeitige Abschrift auf Pergament.

{Intitulatio}Wir bruder Cunrad Czolner vom Rotenstein homeister des ordens der bruder des spitals send Marien des dutschen huses von Jerusalem
{Narratio}bekennen offentlich in dyssem brive, das wir myt rothe und vulbort unser mitgebitger syn mit den erwirdigen in Gothe vetern und hern, dem herren Reinhard bisschof czu Colmensee, dem herren Johann bisschof czu Marienwerder und dem herren Heynrich bisschof czum Brunsberg und myt den erbarn geistlichen herren Peter apt czu Polplin und Siffrid apt czur Oliva und mit andern prelaten des landes obir eyn komen und czu rothe worden von des czinses wegen, der in dem lande gemeyn ist, das man dy mark koufft umb czen, wider czu kouffende umb das selbige gelt, das mans obir al in dem lande myt dem selbigen czinse halden sulle, als hye nach styet geschrieben:
{Dispositio} Czum irsten was czinses vor dysser cziet recht und redlich gekouft ist myt vorworten und mit globe wider czu kouffen, der sal bliben, und den sal man gelden alz lange, bis das man in wyder koufft umb sulch gelt, alz her gekoufft ist. Wil der czinsmann dy grunt losen vor den czins, der do in gekoufft ist, {Toeppen S. 45} das liege an dem selbigen czinsmann, do mithe sal her des czinses ledig syen, und {Voigt S. 49} der den czins dor inne hot der sal sich des erbes undirwinden und der herschaft recht thun, und ouch roth und recht den nocborn, do dy grunt lygt, addir sal sich des czinses vorczyen und des erbes.
Vortme sal keyner czins vorkouffen, wen in erbe, is sye vrye addir czinshaftich, und ouch nymant czins kouffen noch vorkouffen in dye selben erbe ane der herschaft wille und orlop. Den kouf sullen sye thun und luytbarn vor scheppen und in eyme gehegthen dinge, dy den kouf vort brengen vor dy herschaft, dy mag das denne bestetegen myt briven und ingesigeln, ap sy wil.
Ouch sal man dy mark czinses nicht veer^a) vortmer koufen addir vorkouffen den umb czwelf mark.
Wer nue vort me den vorgenanten czins, der wider czu kouffen ist, anders kouft, den in der wyse, alz hy vorgeschriben ist, der sal vorlysen syn gelt und ouch den czins.
Ouch ap imant syn erbe vorkoufthe uf thage und im das erbegelt nicht beczalet wurde uf dy thage, der sal keynen czins von dem gelde nemen. Wer addir czins addir gelt do vor neme, der sal is abeslon an dem houptguthe. Ist addir des houptguthes nicht me, so zal her das wider keren. Thut her das nicht, so rechent man im das gelt vor wucher, das her hot ufgehaben.
{Corroboratio}Czu bekentnis und merer sichirheit dysser dinge habe wyr unser ingesigel an dissen brif lasen hengen.
{Datierung}Gegeben uff unserm huze Marienburg in der jorczal Christi driczenhundert und in dem sechs und achczichsten jore an der nehesten Mitwochen noch Philippi und Jacobi der apposteln.
{Zeugen}Geczug sint unser lyben bruder Cuno von Libenstein groskumpthur, bruder Cunrad von Walrode obirster marschalk, bruder Sifrid Walpot von Passenheim obirster spitteler und kumpthur czum Elbing, bruder Heynrich Gans obirster trappier, bruder Ulrich Hachinperg triseler, bruder Hanns Marschalk von Vroburg kumpthur czu Cristburg., bruder Lodewik Wafeler kumpthur czu Thoron, bruder Friderich Egloffsteiner kumpthur czur Balge, bruder Fredrich von Wenden kumpthur czu Brandenburg, bruder Johan Beffart kumpthur czu Osterode, bruder Rutger von Elner phleger czum Tuchel, her Merthen unser capplan und tumher der kirchen czu Colmense, Karl von Lichtenstein, Wernher von Tetingen unser compan und vil andir ersamer luythe.

Textkritische Anmerkungen

^a) Toeppen setzt hier neer [= näher] gegen die anderen Ausgaben.

Zitieren dieser Edition: (1) virtuell: URL (http://www.spaetmittelalter.uni-hamburg.de/Urkundenbuch/pub/js-fs/js-fs37.htm) und Datum der Einsichtnahme; (2) im Druck: PrUB, JS-FS 37(1386 Mai 2. Marienburg)
Bearbeitungsstand: Text eingegeben (26. Februar 2002, Frauke Schmitz) – Datum überprüft (26. Februar 2002, Frauke Schmitz) – Text mit PrUB oder sonst Druck kollationiert ( 4. März 2002, Frauke Schmitz /17.März 2002, Jürgen Sarnowsky) – Text mit Or. kollationiert () – äußere Merkmale beschreiben ()

Datum der Erstanlage: Dienstag, 26. Februar 2002 – Letzte Änderung: 17. März 2002 von Jürgen Sarnowsky

Zurück zur Hamburger Homepage / zurück zur Regestenliste für 1386.