PrUB, DH 418

© Dieter Heckmann, Werder / Berlin (2010)


1521 Oktober 21. Rom
{Regest}
Der Revaler Domdechant Nicolaus Blanckfeldt an Hochmeister Albrecht von Brandenburg[-Ansbach]: Absicht des Papstes, weder dem Postulierten noch dem Kapitel von  Riesenburg [Pomesanien] nachteilig zu werden; Bitte um Geldsendung zur Beförderung der Angelegenheit vor Ort; Gefahr der Besetzung des Bischofsstuhls durch den von Polen favorisierten Cardinal [Achilles de] Grassis; Schätzung des Verkaufwertes des [römischen] Ordenshauses und Empfehlung, die Häuser zu Viterbo und Montefiascone bei einem Verkauf mit zu veräußern.

{Überlieferung}
A = Geheimes Staatsarchiv PK, XX. HA Hist. StA Königsberg, OBA Nr. 25134.

{Drucklegungen}
---

{Diplomatische Erörterung des Stücks}
Ausf., eigenhändig, Pap.


Durchlauchstigher, hochghebornner fursthe, ghenedigher herr, auff e[ure] f[urstliche] g[henaden] brieff unnda) expedicion(em) das episcopat Resenberch1) belanghende habe ich e[ure] f[urstliche] g[henaden] ghesrieben iczunde achthaghe vorsynen unnd e[ure] f[urstliche] g[henaden] widerumme zw erkennen ghegheben, was bescheyt unnd antwerdt wyr alhyr bey bobstliche heylikeyt darauff entfanghen haben, abe das bobstliche heylikeyt e[ure] f[urstliche] g[henaden] unnd dem postulato zw Resenborch noch dem capittell aldar nicht wil nachteylich seijn, ßo das capittel dar recht hot zw erwelen adder postuliren eynen bischoeff unnd hot das selptighe von altem herkommen durch concordata der Deuczen nacion mit bobstliche heylikeyt adder durch eyn indultum von bobstlicher heylikeyt yn ghegheben adder zwghelassen; ßo sol disse sache adder postulacion mit gotthes hulffhe iren bescheyt unnd guthen vortganck ghewynnen unnd w[i]l selptighen alsdan hanthaben unnd beschuczen. Habe och e[ure] f[urstliche] g[henaden] weyter angeczeighet unnd beghert, e[ure] f[urstliche] g[henaden] welte dar vor seijn, das eins von den beijden mit denn aller ersthen mit gelde zw vorfurderunghe der sachen, wy ich in meynen beyden briven an e[ure] f[urstliche] g[henaden] unnd h[errn] bischoeff zw Samlandt2) habe angheczyt, muchte her (mu)er ghefertighet werden, ßo myr eyns wils goet erlanghen von den beyden ßal ab goet dy sache iren guthen vortganck ghewynnen. Ich habe e[ure] f[urstliche] g[henaden] och anghetzeijghet, das man in keynen weghe den cardinal Grassis3) von des bischoeffs von Polen4) weyhen sal in dij possessio lassen, dan er hoet mit eczlichen dy bullen hyngheschiekt, dy selptighe intzunemen, hoet das capittel ancuczeighen, wen seij dy possession zuczunemen begherende seyn, das bobstliche heylikeyt zw milde unnderricht ist worden, unnd hornachmals alze er vorstanden hott, das das capittel postulirtb) hat unnd dar recht zw haben zw postuliren, hoet seyn heylikeyt dy sache tzw vorhoren, dem cardinali s[anctorum] c[orona]torum quatuor5) befolen. Dyweyle aber dy sache in rechte henghende ist, hoet das capittel dy possession nicht zw gheben, ßolanghe eyn rechtlicher anspruech dar in gheghanghen ist. Unnd sunst och - wy ich e[ure] f[urstliche] g[henaden] in meynem negesthen brive habe angetzeighet - wyr thuen alhyr och vleis, ßo es mughelich were, alhyr zw bekommen.{Bl. 1v} Wyr haben aber bysher nichts mughen erkunden. Ich habe e[ure] f[urstliche] g[henaden] och angetzeiget, das man das haus alhyr kauffhen wil unnd beut darvor 5 thausen guld(en) Reyns. Aber ich vorstey auß nu, das er spricht umme 4 oder 5 fl. Solt es noch nicht zw thuende seyn, das man dar muchte fuel 6 thausent vor krighen. Mer is es och nicht werdthc), dan es ist alle jar gerlich beswert mit 45 fl Reins ane eyn ort, darvon dy doche unnd den munnchen austzurichten. Wen e[ure] f[urstliche] g[henaden] das ghesynt ist tzu vorkauffhen, ßo wirdt es och das besthe seyn, e[ure] f[urstliche] g[henaden]d) verkauff das ander och, das zw Witerbie6) unnd Monteflask(e)nn7) ist, das sich auch auff thausent fl erstrecken muchte, kan e[ure] f[urstliche] g[henaden] dy selptighen dansze bey e[urer] f[urstlichen] g[henaden] fiele nutzlicher anleghen dan alhyr. Leghet man es an eyn ander haus, kommet heuthen adder morghen eyn ander babst, der gist das weck. Och solthe man dis haus bauuen, wurde jare) fiele geldes darzw ghehoren. Man thuet es mit 5 ader 6 thausent Ducat(en) nicht, ßo man etwes erlich bauuen welthe dan das haus wol ghebaut sej. Es ist alt unnd och der gassen halben, wen gasse sal gericht außghen, wirdt dem hause jar fiele abegheyn. Dis habe ich e[urer] f[urstlichen] g[henaden] nicht wust zw vorhalthen. E[ure] f[urstliche] g[henaden] wirt hyr in dees besthe wol ermessen. Ich habe e[urer] f[urstlichen] g[henaden] dis noch eyn mol ghesrieben kurtzlich, ob der ander brieff e[urer] f[urstlichen] g[henaden] noch nicht were zwhanden ghekomen, wen disser botthe, dem ich disse brive habe uberantwerdt, ist myr ungheferlich mit der eyle vorgefallen. Hyrmit befele ich e[ure] f[urstliche] g[henaden] goet dem almechtighen unnd seyner lieben mutter Marien der feisthe e[ure] f[urstliche] g[henaden] zw eynem seylighen langhe leben unnd befele mich e[urer] f[urstlichen] g[henaden]. Gegheben zw Roma am taghe der elff tausent junferen thaghe anno [15]21

E[ure] f[urstlicher] g[henaden]        willigher dyner                                                                                                                            Nicolaus Blanckfeldt8)
                                                                                                                                                                                                        techent zw Reuel
 

Durchlauctighesten unnd hoechghebor(en)
[furst]hen unnd hern, hern Albrechten
gho[t]s ghenaden margkgraw tzw
[Brandenbu]rkg, tzw Stettyn, Pommen hercz(o)k,
[burgkgra]wen tzw Nurenberch, des
ordens tue Preussen hoech[meister]
meynem ghenedigesthen hern
 


Textkritische Anmerkung:

a)    unndt davor.
b)    Über gestr. gheweldt.
c)    Aus wirdtch korr.
d)    Es folgt vorkof.
e)    Aus gar korr.


Inhaltliche Anmerkung:

1)   Riesenburg, Residenz des Bischofs von Pomesanien.
2)   Georg von Polenz, Bischof von Samland (1519 - + 1550).
3)   Achilles de Grassis, Kardinal (1511-1523).
4)   Polen.
5)   Laurentius Pucius (Pucci), Kardinal der Titelkirche Sanctorum Quatuor Coronatorum (1513 - + 1531).
6)   Viterbo, n. Rom.
7)    Montefiascone, n. Viterbo.
8)    Nicolaus Blanckfeld, Domdechant zu Reval und Anwalt an der päpstlichen Kurie (+ um 1522).
 

Zitieren dieser Edition: (1) virtuell: URL (http://www.spaetmittelalter.uni-hamburg.de/Urkundenbuch/pub/dh/dh418.htm) und Datum der Einsichtnahme; (2) im Druck: PrUB, DH 418 (1521 Okt. 21. Rom)
Bearbeitungsstand: Text eingegeben (D. Heckmann, 1.9.2010) Datum überprüft (D. Heckmann, 1.9.2010) - Text mit PrUB oder sonst Druck kollationiert () - Text mit Or. kollationiert () - äußere Merkmale beschrieben (D. Heckmann, 1.9.2010)
Datum der Erstanlage: Montag, 1. September 2010 - Letzte Änderung: 1. September 2010 von Dieter Heckmann

Zurück zur Hamburger Homepage / zurück zurRegestenliste für 1521